Алай йисуз Дагъустанда ачухдай виридалайни чIехи цIийи мектебрикай сад Махачкъаладин «Ипподром» микрорайонда эцигзава. Ана кIелдай 1224 чка жеда. «Лезги газетдиз» РД-дин Гьукуматдин пресс-къуллугъди хабар гайивал, милли «Образование» проектдин сергьятра аваз и мектеб эцигуниз 1,3 миллиард манат пул чара авунва. Сергей Меликован къарардалди, ам Украинада кьиле физвай махсус серенжемда телеф хьайи Алексей Суханован тIварцIихъ яда.
31-июлдиз республикадин премьер-министр Абдулмуслим Абдулмуслимов, вице-премьер Муслим Телякавов, Махачкъаладин мэр Юсуп Умавов, РД-дин образованидин ва илимдин министр Яхья Бучаев ва масабур и мектебда эцигунрин кIвалахар кьиле физвай гьалдихъ галаз таниш хьана.
Малум хьайивал, эцигунрин кIвалахар саки акьалтIарнава. Пудратчи карханадин векилди Дагъустандин Гьукуматдин делегациядиз мектебдихъ галай пищевой, актовый, спортдин залар, гьавизар, футбол къугъвадай майданар къалурна. Ибурулай гъейри, цIийи мектебда 740-дав агакьна тамашачияр гьакьдай концертрин зални эцигнава.
РФ-дин оборонадин министерстводин махсус эцигунрин управленидин кьил Агьмед Дибирова хабар гайивал, мектебдиз мукьва мулкуна министерстводин такьатрихъ телеф хьайи майор Алексей Суханован тIварцIихъ галай аллея кардик кутада ва ана адан экуь къамат эбеди авун патал бюстни эцигда.
Абдулмуслим Абдулмуслимова кьиле тухванвай кIвалахрилай вичин разивал къалурна, вири месэлаяр пландин бинедаллаз акьалтIарун патал объектдал кIвалахзавайбурун кьадар артухарунин буйругъ гана.
Чи мухбир
