1-августдиз Кьурагь райондин кьил Замир Азизова ЦУР-диз (Центр управления регионом) интервью гана. Адан сергьятра аваз веревирд авур месэлайрикай сад муниципалитетда Украинада кьиле физвай дяведин махсус серенжемдин (СВО) иштиракчийриз гузвай куьмекрихъ галаз алакъалу тир.

З.Азизова къейд авурвал, администрацияди серенжемдин игьтияж авай гьар са иштиракчидиз чилин участок чара ийидай къарар кьабулнава. Эгер гьахьтинбур аваз хьайитIа, абуру муниципалитетдин администрациядиз хабар гана кIанзава.

«Чун вири рекьерай абуруз куьмекар гуз гьазур я. Абуру, чIехи пай жегьилри, чи итижар, ислягьвал, архайинвал хуьзва, кьегьалвилер къалурзава. Абуруз куьмек гун чи буржи я», — лагьана райондин кьили.

Чилер чара авунин кIвалах муниципалитетда гатIуннава лагьайтIани жеда. Мисал яз, идалай вилик СВО-дин Кьурагьай тир са иштиракчиди вичиз Аладаш хуьре чилин участок чара авун тIалабна. Месэла саки гьялна акьалтIарнава. Исятда документар къайдадиз гъизва. Адалай гуьгъуьниз чилин участок арзачидин хсусиятда гьатда.

Интервьюдин сергьятра аваз Замир Азизова Аладаш хуьре эцигзавай мектебдин гьакъиндайни малуматар гана. Адан гафаралди, жуьреба-жуьре себебар аваз хейлин йисаралди эцигна акьалтIариз тежезвай и мектеб 2024-йисан эхирралди ишлемишиз вахкуда. Алай вахтунда ина эцигунрин кIвалахрин 70 процент акьалтIарнава.

Чи мухбир