Ахцегь районда халкьдин тарих, милли адетар, руьгьдин ивирар хуьниз кьетIен фикир гузва. Мукьвара «Фольклордин югъ» лишандик кваз ина кьиле фейи гьар йисуз тухузвай этно-фестивалди нубатдин сеферда и кар тестикьарна.
Муниципалитетдин медениятдин уьмуьрда лишанлу вакъиадиз элкъвенвай и мярекат чкадин администрациядин культурадин, спортдин ва жегьилрин сиясатдин рекьяй управленидин кьил Къистер Гъаниевади ачухна. Ада къейд авурвал, фестивалди лезги халкьдин сивин яратмишунар хуьнин ва санлай милли меденият вилик тухунин карда кьетIен чка кьазва. Мярекатдин кьилин макьсадрикай сад, адан гафаралди, акьалтзавай несилриз чIехи бубайрилай агакьнавай адетар чирун, абур руьгьдин ивирриз мукьва авун я.
Фестивалдин сергьятра аваз тешкилнавай мярекатар Ахцегьрин хуьре авай «Набережный» паркуна кьиле фена. Республикадин лайихлу артистри, чкадин гьевескарри, ашукьри лезги халкьдин манияр тамамарна, кьуьлердайбурун дестейри кьуьлерна, тарихдикай, адетрикай рикIел аламукьдай ихтилатар авуна.
Иштиракчияр патал лезги халкьдин милли хуьрекар алай суфрани ахъайнавай. Ашкъи авай гьар садавай абурун дад акваз жезвай. Къейд ийин хьи, фестивалдин иштиракчийрин арада Урусатдин жуьреба-жуьре регионрай атанвай туристарни авай.
Чи мухбир
