СтIал Сулейманан райондин администрациядин образованидин управленида Запорожьедин Мелитополь шегьерда гуьгьуьллудаказ муаллим яз кIвалахзавай курхуьруьнви Абубакар Мирзебалаевахъ ва адахъ галаз Дагъустандиз мугьман хьанвай муаллимрихъ – Елена Горбовадихъни Марина Серовадихъ – галаз гуьруьш кьиле фена.
Управленидин начальник Гьуьсейн Шихбабаева ватанэгьли ва мугьманар хушдаказ кьабулна ва абуруз савкьатар гана.
Къейд ийин хьи, Абубакар Мирзебалаева хейлин йисара къанун-къайда хуьдай органра къуллугъна. Ам дяведин гьерекатрин ветеран, са жерге шабагьрин сагьиб я. Военный къуллугъдилай элячIайдалай кьулухъ Ичинрин хуьруьн мектебда географиядинни биологиядин муаллим яз кIвалахзавай. Алатай йисалай гатIунна, ада Мелитополь шегьердин са мектебда муаллим яз кIвалахзава.
ТIатIилрин (каникулы) вахтунда А.Мирзебалаев вичихъ галаз санал кIвалахзавай юлдашарни галаз, ял ягъиз, хайи ватандиз хтанва. Ада мугьманриз Цмуррин мектеб, СтIал Сулейманан районда авай надир чкаяр ва къадим Дербент шегьер къалурна.
Агьмед Магьмудов
