Ислен юкъуз РД-дин Кьил Сергей Меликован регьбервилик кваз исполнительный гьукумдин органри бюджетдин такьатар ишлемишзавай гьалдиз, етим аялар яшайишдин кIвалералди таъминаруниз ва яшайишдин икьрарар кутIунуниз талукь месэлаяр веревирдна.
Бюджетдин такьатар ишлемишуникай республикадин сад лагьай вице-премьер Руслан Алиева гегьеншдиз доклад авуна. Ада бюджетда тайин тир макьсадриз чара авунвай пулдин такьатрин ва абурун куьмекдалди кьилиз акъудзавай кIвалахар вахтунда акьалтIарунин гьакъиндай жавабдарвал министерствойринни ведомствойрин руководителрин хиве авайди къейдна.
Етим аялар яшайишдин кIвалералди таъминарунин гьакъиндай РД-дин эцигунрин, архитектурадин ва ЖКХ-дин министр Артур Сулейманова ихтилатна. Адан гафарай малум хьайивал, алай йисан 1-январдин делилралди, республикада государстводин патай яшайишдин кIвалер къачудай ихтияр 3276 касдиз авай. И макьсадриз бюджетда 780 миллион манат пул чара авунвай. Министрди къейд авурвал, вири шегьерривни районрив пулдин такьатар агакьарнава.
«Къенин юкъуз 18 шегьердини районди етим аялар патал кIвалер маса къачунва. И жигьетдай Акъуша, Бабаюрт, Гергебил, Докъузпара, Лак, Сергокъала, ЦIунти ва Хунзах районри кьиле тухузвай кIвалах тариф авуниз лайихлу я», — лагьана А.Сулейманова.
С.Меликова 1-сентябрдалди кIвалер къачудай ихтияр авай етим аялрин сиягь мад сеферда ахтармишунин буйругъ гана. Дагъустандин Кьили къейд авурвал, а сиягьда государстводин патай кIвалер къачудай ихтияр авачир ксар гьатуниз рехъ гана кIандач.
Пуд лагьай — яшайишдин икьрарар кутIунин — месэладай доклад РД-дин зегьметдин ва яшайишдин рекьяй вилик финин министр Мурад Къазиева авуна.
Чи мухбир
