Дагъустандин здравоохраненидин министерстводин пресс-къуллугъди хабар гузвайвал, 1 ва 8-июлдиз республикадин 35 йисалай виниз яшара авай гьар са агьалидиз чпин вилерин гьал пулсуздаказ ахтармишдай мумкинвал ава…
Чна гьар са агьалидиз и мумкинвиликай менфят къачуниз эвер гузва. ГьикI хьи, вилерин азарри эхиримжи вахтара инсанар гьеле жегьилзамаз (бязи вахтара гьатта аяларни) кIеве тваздайди сир туш. Пешекарри къейдзавайвал, вилерин азарри гзаф пай вахтара кар кардай, азар дериндиз фидалди чпикай хабар гузвач. Вилерин азаррикай виридалайни чIуруди тир глаукома гьа ихьтинбурун жергедай я. Яшлуди, жегьилди талгьана инсан уьмуьрлух мичIи йифе тун мумкин тир и азар вахтунда винел акъудунихъ еке метлеб ава.
Малуматда хабар ганвайвал, глаукома вахтунда винел акъудуниз талукьарнавай серенжемрин сергьятра аваз, винидихъ къалурнавай йикъара (ихьтин мумкинвал 24-июндизни хьанвай) вилерин ишигъ ахтармишиз кIанзавайбурувай чеб яшамиш жезвай районрин ва шегьеррин поликлиникайра, глаукомадин кабинетра, я тахьайтIа республикадин офтальмологиядин больницада (РОБ) — глаукомадин центрада — йикъан сятдин 9-далай нянин 4-далди са жерге ахтармишунар (вилерин давление алцумун, авторефрактометрия, периметрия, биомикроскопия, офтальмоскопия, визометрия) кьилиз акъудиз жеда.
Эгер глаукома авайди винел акъатайтIа, а касдиз алава ахтармишунар авун патал направление гуда.
* * *
Гьар вацра пулунин выплата (ЕДВ) къачузвай дагъустанвийрикай цIи 53 агъзур касди яшайишдин къуллугърин набор (НСУ) хвенва. Идакай чаз Дагъустандин Яшайишдин фондунин пресс-къуллугъди хабар гана.
НСУ-дик инсан лазим дарманралди таъминарун, санаторийриз ва курортриз путёвкаяр, шегьердин мукьув гвай чкайриз (пригородный) электропоездра аваз физ-хтун, гьакIни сагъламвал мягькемардай чкайриз физ-хтун акатзава.
Малуматда мадни хабар ганвайвал, НСУ-дин кьезилвилер авай дагъустанвийрин арада виридалайни гзаф менфят къачузвай серенжем санаторийризни курортриз путёвка къачун я. Россиядин амай регионра лагьайтIа, и категориядик акатзавай ксари шегьердин патав гвай чкайриз физ-хкведай электричкайра — пулсуздаказ финикай.
Дагъустандин Яшайишдин фондуни рикIел хкизвайвал, кьезилвилер авай агьалийри ЕДВ ва я НСУ къачун патал («Госкъуллугъар» порталдикай, винидихъ тIвар кьунвай фондунин муьштерийрихъ галаз кIвалахдай къуллугъдикай ва я МФЦ-дикай менфят къачуналди) 1-октябрдалди арза гун лазим я. Арзада къалурнавай жуьре (пул къачунин ва я яшайишдин къуллугърин набор) цIийи йисан 1-январдилай къуватда гьатда. Эгер арза ганватIа, мад цIийиди гун герек туш. Ам агьалиди вичин къарар дегишдалди, яни муькуь къайда хкядалди, къуватда амукьда.
Чи мухбир
