Са йисан вахтунда Россияда чилин къиметар 10 процентдин багьа хьанва – гьам объектдин санлай къачур кьадардин, гьамни са соткадин, хабар гузва «Авитодин»  пешекарри. Абуру уьлкведин 33 региондин шегьеррин  къерехра авай участокрин къиметар ахтармишна.

ИкI, хабар гузвайвал, 2022-йисан сад лагьай паюнин делилрив гекъигайла, промышленный тайинвал авай чилерин къиметар 15 процентдин багьа хьанва, хуьруьн майишатдин – 13, кьилдин ксаривай яшайишдин кIвалер эцигиз жедай кIвалерин къиметар 8 процентдин.

Пешекарри ахтармишунар кьиле тухвай 33 региондикай 22  субъектда къиметар  хкаж хьанва. Виридалайни гзаф чилин къиметар  Дагъустанда (47 процентдин), Ростовдин областда (30%), Татарстанда (23%), Омскдин областда (20%) ва Ставрополдин крайда (20 %) багьа хьанва.

Пешекаррин гьисабунралди, шегьердивай къерехда авай  участокрин иесийри са соткадай, юкьван гьисабдалди, 55 агъзур манат тIалабзава.  Виридалайни багьа чил Краснодардин крайда (194 агъзур манат), Ростовдин областда (188 агъзур манат), Дагъустанда (184 агъзур манат), Крымда (167 агъзур манат) ва Москвадин областда (106 агъзур манат) ава. Гьа са вахтунда виридалайни агъуз къиметар Кировдин  (15 агъзур манат) ва Смоленскдин областра (20 агъзур манат), Пермдин крайда (23 агъзур манат), Вологдадин (25 агъзур манат) ва Ярославлдин областра (26 агъзур манат) ава.

Чи мухбир