12-июндиз Ахцегь райондин Смугъулрин хуьре юкьван школадиз дяведин махсус серенжемда игитвилелди чан гайи жегьил офицер Аваз Агъакишиеван тIвар гуниз талукьарнавай митинг кьиле фена. Мярекатда кьиле Ахцегь райондин регьбер Абдул-Керим Палчаев аваз атанвай дестеди, патарилай хтанвай мугьманри, игитдин мукьва-кьилийри, школадин коллективди ва смугъулвийри иштиракна. Мярекат райондин культурадин управленидин начальникдин заместитель Сулейман Сулейманова кьиле тухвана.
Куьруь къейд.
Агъакишиев Аваз Мегьамедович 1997-йисан 27-ноябрдиз Смугъулрин хуьре дидедиз хьана. Хайи хуьруьн школа акьалтIарна, 2014-йисуз ам Кострома шегьердин военный академиядик экечIна. 2019-йисуз анаг куьтягьай жегьил офицердикай Приморский крайдин Лесозаводск шегьерда авай частуна взводдин командир хьана. 2022-йисуз командованиди ам СВО-дин зонадиз рекье туна. Адан женгинин юлдашрин гафарай, старший лейтенант А.Агъакишиев фронтдин виридалайни жавабдар, четин участокра жедай ва женгера, халис дагъвидиз хас викIегьвилер къалуриз, вичин хсуси чешнедалди юлдашар руьгьламишиз, тапшуругъар тамамардай. 2023-йисан январдиз душмандихъ галаз барабарсуз къуватрин гзаф ивияр экъичай са женгина, гьайиф хьи, Аваз телеф хьана. РФ-дин Президент В.В.Путинан къарардалди, адаз кьейидалай кьулухъ «Жуьрэтлувиляй» орден гана. Эхь, Аваз Агъакишиева куьруь ва гьа са вахтунда лайихлу уьмуьр кечирмишна, вичин тIвар акьалтзавай несилдиз ватанпересвилин чешне яз тарихда туна.
– Гьуьрметлу смугъулвияр, мугьманар! – лагьана Ахцегь райондин кьил Абдул-Керим Палчаева. – Къе, Россиядин суварин юкъуз, чун хуьруьн школада лап важиблу месэла себеб яз кIватI хьанва. Райсобранидин 2023-йисан 26-апрелдин къарардалди, Смугъулрин хуьруьн школа Запорожьеда хайи Ватандин азадвални аслу туширвал патал СВО-да игитвилелди телеф хьайи старший лейтенант Аваз Мегьамедович Агъакишиеван тIварцIихъ янава. Ватандин вилик вичин итимвилин пак буржи ада игитвилелди тамамарна. Ихьтин кьегьал хва тербияламишай диде-бубадиз, муаллимриз чухсагъул! Игит хва къакъатунин тIал кьезилдардай гафар авач, квехъ галаз чун вири ясдава.
Гуьгъуьнлай райондин регьбер Абдул-Керим Палчаева, военком Рафик Мегьамедова, игитдин ими, Ставрополдин крайдин МЧС-дин начальникдин заместитель, генерал-майор Апрель Агъакишиева, «Смугъулрин хуьр» СП-дин кьил Аслан Мегьдиева ва школадин директор Сейфуллагь Назарова мемориалдин махсус кьул ачухна ва анал цуьквер эцигна. Школадин ученик Мегьедин Гьажиева устадвилелди «Лекь» шиир кIелна. Игитдин гьуьрметдай РФ-дин Гимн тамамарна, сергьятчи аскерри-автоматчикри цавуз салют ягъайдалай ва митингдин иштиракчияр са декьикьада кисна низамда акъвазайдалай кьулухъ, микрофондихъ винидихъ тIварар кьур ксар атана. Чпин рахунра абуру къейд авурвал, им неинки Аваз рикIел хуьнин, гьакI гъиле яракь аваз уьтквемвилелди хайи Ватан, адан итижар хуьзвай чи вири рухвайриз гьуьрмет авунин гуьмбет я.
– Гьакъикъатдани, им Украинадихъ галаз ваъ, НАТО-дихъ, рагъакIидай патан уьлквейрихъ галаз физвай къизгъин дяве я. Четинвилер акьалтайтIани, гьахъ винел жедайдал, чна душманрин винел гъалибвал къачудайдал шак алач. Жегьил офицер Аваз Мегьамедовича чаз, гьар са россиявидиз, Ватан кIевевайла ам гьикI хуьдатIа, вичин чешнедалди къалурна. Чи азадвал, уьлкведин аслу туширвал патал чанар къурбанд авур рухваяр гьамиша рикIел хвена, абурун игитвилерал дамахна ва чпин чешнейралди жегьил несилар тербияламишун важиблу я. Дяведавай чи аскерриз куьмекун, абурун хизанрин къайгъу чIугун чи буржи я. Авазан тIвар хуьруьн школадиз гуналди эбеди авур, адан мукьва-кьилийрин рикIикай хабар кьур, хатур къачур куьн вири пара кьадар сагърай! – лагьана игит хцин мукьва-кьилийрин патай генерал-майор Апрель Агъакишиева.
Дашдемир Шерифалиев
