«Дагъустан Республикадин дагълух мулкар яшайишдинни экономикадин жигьетдай виликди тухун» госпрограммадин сергьятра аваз субсидияр къачун патал 2023-йисан 15-июндилай 26-июндалди алава яз арзаяр кьабулда, хабар гузва РД-дин экономикадин ва мулкар вилик тухунин министерстводин пресс-къуллугъди.
Къейд ийин хьи, субсидияр республикадин гьуьлуьн дережадилай 500 метрдилай кьакьанда авай дагълух мулкара майишатчивилин кIвалахар кьиле тухузвай карчийривай къачуз жеда.
«Арзаяр пуд хиляй хьанвай харжийрин 50 процентдив агакьна такьатар эвез хъувун патал кьабулзава: промышленный суьрсет акъуддай карханаяр арадал гъунай ва алай аямдин истемишунрив кьадайвал туькIуьрунай; недай суьрсет ва мижеяр акъудун патал лазим тадаракар маса къачунай; суьрсет хуьдай логистикадин центраяр (майваяр ва емишар хуьдай гьамбарханаяр) эцигунай», — лугьузва идарадин векилди.
Адан гафаралди, алай йисуз министерстводи арзаяр ганвай 153 карчидиз санлай къачурла тахминан 20 миллион манатдин кьадарда аваз куьмек гунин гьакъиндай къарар кьабулнава. Арзаяр ганвай вирибурухъ галаз икьрарар кутIуннава ва абурун чIехи паюнив такьатар агакьнава.
«Санлай къачурла, дагълух чкайра хуьруьн майишатдин суьрсет гьасилзавайбуруз субсидияр гун патал чна 75 миллион манат фикирда кьунва. Программа уьмуьрдиз кечирмишун давам жезва», — лагьана РД-дин экономикадин ва мулкар вилик тухунин министр Гьажи Султанова.
РикIел хкин, «Дагъустан Республикадин дагълух мулкар яшайишдинни экономикадин жигьетдай виликди тухун» госпрограмма РД-дин экономикадин ва мулкар вилик тухунин министерстводи 2019-йисалай уьмуьрдиз кечирмишзава.
Чи мухбир
