Гьар са диде-бубадин рикIевай эрзиман мурад веледар бахтлу хьун, абурулай халкьдиз, Ватандиз вафалу жез алакьун я. Иллаки аскервилиз физвайла, жегьилрин япара цазвай келимаяр я: “килиг гьа, жув дуьздаказ  твах,  командиррихъ яб акала, аскервилин уставдал амал ая, кьегьалди хьиз къуллугъна хъша”.

Хва армиядин жергейриз рекье твадайла, ихьтин гафар Сулейман-Стальский  райондин Курхуьрелай тир Элина ва Курум Саругълановрини лагьанай. Насигьатрал амал авунин нетижада абурун хци чешнелудаказ къуллугъна. Энвера Суворован, Кутузован ва Александр Невскийдин орденар авай Симферополдин артиллериядин 147-полкуна къуллугъна. Ам виридаз чешнелу хьайиди адаз 73966-нумрадин частунин командир, гвардиядин полковник М.Власован къулар алаз ганвай са шумуд грамотади шагьидвалзава. Эхиримжи грамота адаз ЧIехи Гъалибвилин 73 йис тамам хьайи суварин вилик гана.

Суварилай гуьгъуьниз Энвер Саругъланов вичин диде-бубадин патав уьзягъдиз хтана. И карди неинки Курум, Элина, гьакI абурун мукьвабур, санлай вири хуьруьнвиярни шадарна.  Младший сержант Саругълановаз  частунай тарифдин  характеристика ва Гьуьрметдин ­грамота ганва. Адахъ юридический образование ава.  Са тIимил ял яна, Энвер кIвалахдин суракьда жеда.

Райсудин Набиев