Зи сифте муаллим Рамазан Велибегов Цналрин ва къунши хуьрера гьар жуьредин къуллугърал хьана. Ам вичин уьмуьр баркаллувилелди тухузвай инсанрикай сад я. Мукьвара Р.Велибегов РФ-дин писателрин Союздиз кьабулна. За жуван муаллимдиз и агалкьун рикIин сидкьидай мубаракзава ва адахъ чандин сагъвал, яргъи уьмуьр, мадни еке агалкьунар хьун алхишзава.
Велибегов Рамазан муаллим,
Гьулдан хьиз, ви кIубанвал хьуй лигим!
Вафалувал хуьзвай хайи Ватандиз,
Дережаяр хкаж хьурай кьакьандиз!
Заз сифтедай карандаш кьаз чирайди,
Дидед чIалал дуьздиз рахаз чирайди.
Ви зегьметар алатдач зи рикIелай,
Вун я, гьелбет, муаллим зи рикI алай.
Вуна гайи тарсар рикIел алама,
Насигьатар на гайи захъ галама.
Гьар са кардай къе ваз сагърай лугьузва,
Зи гьиссери ваз саламар тухузва.
Ви тарсари закай итим авуна,
Ватандизни зун лайих яз акуна.
Ви куьмекдалд мурад кьилиз акъудна,
Четинвилер уьмуьрда за алудна.
Дамахзава вал ви гьар са сухтади,
Виш йисар гуй рагъ алай ваз Худади.
Агалкьунар гзаф хьурай, муаллим!
Дагъвийрин ирс, тариххуьзвай муаллим!
Тарихчи я, публицист я, шаир я,
Ви къелемдин гьар са“емиш” магьир я!
Вун хьтинбур гзаф хьуй чи хуьрера,
Куь гьунарар хуьзва элди рикIера.
Гьуьрметдивди, Шихмегьамед Агьмедов.
