“МТС” ПАО-ди Мегьарамдхуьруьн райондин Гарагърин хуьре сотовый алакъадин къурулуш туькIуьрунин кIвалахар акьалтIарнава. Сотовый алакъа ва мобильный интернет и хуьре сифте сеферда яз пайда хьанва. Гила Гарагърин ва гьакIни патарив гвай Макьар-Къазмайрин, Вини Гъепцегьрин, Вини Филерин агьалияр, гьакIни “Мегьарамдхуьр-Ахцегь-Рутул” шегьре сотовый алакъадалди таъминарнава.
Гарагърин хуьре са шумуд виш кас яшамиш жезва. Гила, хабар гузвайвал, гьар са агьалидивай ина мобильный алакъа ва алай аямдин рекъемрин къуллугъар ишлемишиз жеда: онлайн-къайдада чирвилер къачуз, фильмайриз килигиз, мукьва-кьилийрихъ галаз алакъаяр хуьз ва икI мад.
Гарагъар Азербайжандин сергьятдин патав гвай ва мобильный дурумлу алакъадалди таъмин тушир эхиримжи хуьр тир. И кар себеб яз, Кьиблепатан Дагъустандиз къвезвай туристар патав гвай Азербайжандин сотовый операторрик акатунин ва международный алакъадал элячIунин четинвилерал гьалтзавай. Гила и месэла арадай акъуднава.
“Кьиблепатан Дагъустандин къурулушдихъ галаз алакъалу мад са важиблу месэла гьялнава. И проект уьмуьрдиз кечирмишунин нетижада гъвечIи са шумуд хуьр, гьакIни Самур вацIун къерехдай физвай шегьре мобильный алакъадалди таъминариз алакьнава. Инанмиш я, Юждагда мобильный алакъадин ерилувал артухаруни туристар патал и чкайрин машгьурвал мадни артухарда”, — баянар гана Дагъустанда МТС-дин директор Карема Изиевади.
РикIел хкизвайвал, алатай йисуз МТС-ди гьакIни кьакьан дагъдин Къурушрин хуьрни мобильный алакъадалди таъминарна. Дагъустанда альпинизмдин центр тир Къурушдилай спортсменар Шалбуз дагъ, Ярудагъ ва Базардуьзуь муьтIуьгъариз рекье гьатзава.
Амина Муслимова
