Хайи эдебиятда (шииратда ва гьикаятда), гьакI тамашиятдани вичин гел кутаз алакьнавай лезги ханумрикай сад Бикеханум Алибегова я. Ам 1953-йисуз Мегьарамдхуьруьн райондин Гилийрин хуьре дидедиз хьана. Хуьруьн мектеб акьалтIарайдалай кьулухъ ада Махачкъаладин культурадин училищеда, ахпа ДГУ-дин филологиядин факультетда чирвилер къачуна.
КIелдайбурун суфрадал ада “Муьгьуьббатдин гуьзгуь”, “Цуькверин багъ”, “Дуьа”, “Москвадин къужахда”, маса ктабар, “Айван кIвал туш”, “Лугьуз тахьай мани” пьесаяр гъана.
Автордин хейлин эсерар урус, азербайжан, маса чIалариз таржума авунва. Пьесаяр Лезгийрин госмуздрамтеатрдин ва КцIарин халкьдин театрдин коллективри сегьнеламишна.
Саки вири ктабар ватандикай, муьгьуьббатдикай, вафалувиликайни вафасузвиликай кхьенвай эсеррикай ибарат я.
Публицист яз, ада чи уьлкведин жуьреба-жуьре пипIера яшамиш жезвай цIудралди инсанрикай рикIел аламукьдай хьтин очеркар, зарисовкаяр кхьена, абурухъ галаз уьмуьрдин важиблу месэлайрай суьгьбетар тешкилна.
Шак алачиз, хайи чIалак ва литературадик кутунвай пай лайихлуди я.
Чна юбилярдиз агакьнавай дережаяр мубаракзава, цIийи теснифрин рехъ давамарун алхишзава.
Мубаракрай юбилей,
Хци хьуй къелем.
Акваз хьурай ви гъилел
Ваз кIани алем…
“Лезги газетдин” редакциядин коллектив
