24-апрелдиз Дагъустандин Кьил Сергей Меликова республикадин шегьре рекьера улакьрин гьерекатдин хатасузвал таъминарунин месэлайриз талукьарнавай совещание кьиле тухвана.

Мярекатдал РД-дин транспортдин ва рекьерин майишатдин министр Жамбулат Салавова хабар гайивал, республикадин сергьятра виридалайни гзаф аварияр арадал къвезвай чкайрин махсус сиягь ­туь­­­кIуьр­нава. Ана 200 участок гьат­нава­. Абурукай Махачкъалада — 49, региондин — 28 ва феде­ральный дере­жадин метлеб авай рекьера 123 ава. Анрал ре­кьерин гьере­кат­дин къай­даяр чIур­­за­вай дуьшуьшар винел акъуддай махсус алатар­ ­(фо­­то­­видеофиксация) кардик ку­тадайвал я.

* * *

25-апрелдиз Сергей Меликова ­яша­йишдин “Фемили-Блок С” комп­лекс­дай кIвалер маса къа­чунвай са жерге агьалийрив куьлегар вахкана.

РикIел хкин, алатай йисан гатуз­ и комплексдай кIвалер маса къачунвайбуру, ам эцигнавай “АРСИ­ групп” компанияди чпин их­тиярар чIурзава лугьуз, республикадин Кьилиз арза авунай. Месэла адакай ибарат тир хьи, агьалийри эцигунардай карханадихъ галаз кутIун­навай икьрардин шартIа­рал асаслу яз, вахт-вахтунда­ пул га­на, амма карханади икьрарда къейднавай вахтунда кIвалер ишлемишиз вахканач. И месэла Сергей Меликова вичин хсуси гуьзчивилик ку­туна. Нетижада къенин юкъуз эцигунардай карханади 12 гьавадикай ибарат тир кIвалера 330 квартира эцигна акьалтIарнава. 300-далай виниз хизанрив С.Меликова шадвилин гьалара куьлегар вахкана.

Алай вахтунда “АРСИ групп” компанияди амай кIвалерни цIийиз тайинарнавай вахтунда ишлемишиз вахкун патал эцигунрин кIвалахар давамарзава.

* * *

Гьа и юкъуз Махачкъалада спортдин  “Динамо” обществодин 100 йис тамам хьуниз талукьарнавай мярекат кьиле фена. Ана Сергей Меликовани иштиракна.

С.Меликова футболдин “Ди­намо” клубдин тарих, агалкьунар ри­кIел хкана. Ада къейд авурвал, командадик кваз къугъвай Лев Яшин варар хуьдайбурукай дуьньяда “Къизилдин туп” премия къачур тек са кас я.

Мярекатдал гьакIни РД-дин Гьукуматдин Председателдин заместитель Рамазан Жафа­ров, РД-дин спортдин ва физический культура­дин министр Са­жид Сажидов ва масабур раха­на, “Динамо” клубдикай чпин фикирар лагьана.­

Эхирдай Сергей Меликова­ Да­­­гъус­тан­­­дин са жерге машгьур спорт­смен­ривни тренеррив шаба­гьар­ вахкана.

21-чка кьазва

Дагъустандин эцигунардайбуру алай йисан 1-кварталда саки 130 агъ­зур кв. метрдин кьадарда авай гзаф мертебайрин кIвалер эциг­на­ва. Идакай  “Дагъустандин экономика” телеграм-каналди хабар гузва.

Эцигунардайбурун Сад тир ресурсдин делилралди, и рекъем, 2022-йисан гьа и вахтунив гекъи­гай­тIа, 1,7 сефердин гзаф я. Кьил­ди­ къа­­чуртIа, алатай йисан сифтегьан пуд вацра 65 агъзур кв. метрдин кьадарда аваз гзаф мертебайрин кIвалер эцигнай.

Винидихъ къейднавай рекъемралди, Дагъустанди уьлкведин 85 региондин арада 21-чка кьазва.

30 сеферда

РД-дин экономикадинни мулкар вилик тухунин министр Гьажи Султанова къейд авурвал, Дагъустанди кIвачин къапар ва абуруз талукь комплектар акъудунин кьадар 30 сеферда артухарнава. Идакай “Дагъустандин экономика” телеграм-каналди хабар гузва.

Адан гафаралди, эхиримжи 6 йисан къене кIвачин къапарин промышленность лап виле акьадайвал вилик фенва. И кардиз цIийи карханаяр арадал гъуни, авай фабрикаяр мадни гегьеншар хъувуни ва гьукуматдин патай такьатар чара авуни куьмек ганва. Нетижада эхиримжи 6 йисан къене, винидихъ къейд авунвайвал, кIвачин къапар акъудунин кьадар 30 сеферда артух хьанва.

Чешмеди хабар гузвайвал, республикада гьар йисуз 3 миллион жуьт кIвачин къапар акъудзава. 2030-йисалди абурун кьадар 10 миллиондив агакьарун пландик кутунва.

Гьа са вахтунда РД-дин промышленностдинни алишверишдин ми­нис­терстводин пресс-къуллугъдин малуматралди, республикада кIва­чин къапариз талукь тир комплектар (подош­ва), кIвачин къапарин къеняй кIанел алкIурдай кьелечI тумажар (стельки) ва мсб. акъудунин карни вилик физва­.

ИкI, Дагъустандин кIвачин къапарин бязи фабрикайра акъудзавай супинаторри ва пресс-формайри къецепатан уьлквейрай гъизвай хьтин затIар эвеззава ва абур уьлкведа, тек са чи республикадилай гъейри, мад санани авач.

Аялрал мукъаят хьухь!

Дагъустандин здравоохране­ни­дин министерстводин телеграм-каналда къейдзавайвал, алай девир къулайвилералди таъминди ятIани, чал гьар камуна аялар патал хаталу тир техника гьалтзава. ИкI, и йи­къара алишверишдин са центрада авай ­эскалаторди 2 йисан яшда авай ­аялдин тупIар кукIварна. Ам гьасятда­ Республикадин аялрин клиникадин азарханадиз агакьарна, ана адан иви авахьун акъвазарна ва хирургиядин рекьяй куьмек гана. КукIвар хьанвай тупIар къутармишиз ­хьанач. Алай вахтунда аялдин гьал къайдадик ква ва адан уьмуьрдиз хаталувал авач.

И дуьшуьшдихъ галаз алакъалу­ яз, Дагъустандин здравоохраненидин министерстводин пресс-къуллугъди чIе­­­хибурун (диде-бубайрин) рикIел хкизва: кIвалера, хуьрек гьазурдай утагъ­ра, аялрин майданрал ва маса чкайра аялрин сагъламвилиз зиян гун мумкин тир алатар ава. Иллаки хаталу­ шейэрик эскалаторар, аттракционар, электроприборар, чIехи температура авай техникаяр акатзава. Гьавиляй аялрал гуьзчивал твах, абурал му­къа­ят хьухь!

«Лезги газет»