Дагъустандин энергетикадин ва тарифрин министр Марат Шихалиева къейд авурвал, вилик квай зулунни хъуьтIуьн вахт алукьдалди республикада гуж акьалтнавай (перегруженные) сетар цIийикIа туькIуьр хъувун пландик кутунва. Идакай “Дагъустандин экономика” телеграм-каналди хабар гузва.
Мисал яз, “Газпром межрегионгаз Махачкала” ООО-дин директор Ризван Мурадован гафаралди, республикада газдин турбайра бес кьадар давление авачир 105 чкадикай ибарат реестр гьазурнава. Адан гафаралди, компанияди мекьивилер алукьдай вахтуниз гьазур хьун патал 103 миллион манат чара ийида.
“Россети Северный Кавказ” ПАО-ди вичин нубатда 124 подстанциядин ва электроэнергия агакьарзавай кар алай 70 линия авай гьалдиз къимет ганва. Анин гендиректордин сад лагьай заместитель-кьилин инженер Виктор Абаимова къейд авурвал, бригадайри къайдадикай хкатай гьалда авай ва нукьсанар квай чкаяр тайинарна, татугай гьалар арадай акъудун патал кIвалах кьиле тухунин график гьазурна.
«Лезги газет»
