Чи хуьрерин аялрин бахчайра бицIекар патал лезги чIалал акъуднавай ктабар тIимил ава. Кьилдин шаирри, гьикаятчийри аялар патал ктабар кхьизватIани, абурун тиражар гъвечIибур я, вири бахчайриз бес жезвач. Идалайни гъейри, бахчайрихъ абур, пул гана, маса къачудай алава такьатарни авач.
Мукьвара агъастIалви карчи, Алкьвадар Гьасанан тIварунихъ галай медениятдинни марифатдин центрадин директордин куьмекчи Мурад Мегьамедкеримова Агъа СтIалрин ва Агъа СтIал-Къазмайрин аялрин бахчаяр патал вичин такьатрихъ “СикIрен уюнар” тIвар алай лезги махарин ктабарни вири дуьньяда машгьур “Золушка” мах лезги чIалал гьатнавай кIватIалар багъишна. Санлай къачурла, — 300 ктаб.
Аялрин бахчайрив абур “Лезги газетдин” кьилин редактор Мегьамед Ибрагьимова вахкана. Агъа СтIал-Къазмайрин бахчадин коллективдихъ галаз кьиле фейи гуьруьшдал ада аялриз гъвечIи чIавалай хайи чIал чирун важиблу тирди ва и карда тербиячийривай цIийи ктабрикай менфят къачуз жедайди къейдна.
Гуьруьшдин эхирдай Агъа СтIал-Къазмайрин бахчадин заведующий Рена Рагьмановади аялриз гьакьван герек ихьтин ктабар багъишунай Мурад Мегьамедкеримован тIварцIихъ разивилин келимаяр лагьана.
Чи мухбир
