Тапанчи жагъана
6-апрелдиз, Махачкъаладин Кирован райондин полициядин отделдин уголовный розыскдин къуллугъчийри тади серенжемар кьиле тухудайла, ахтармишун патал А.Мирзабегован куьчедай физвай “Тойота Камри” машин акъвазарна. Идакай РД-дин МВД-дин пресс-къуллугъди хабар гузва.
Улакьдин рулдихъ 17 йисан яшда авай чкадин жегьил галай. Кьилди ахтармишай вахтунда жегьилдив гвай гуьлле ядай яракь дуьздал акъатна. Винел патан акунрай ам Макарован тапанчидиз ухшарди тир, 8 патронни авай.
ГьакIни, улакь ахтармишайла, полициядин къуллугъчийриз анай къайи яракьрин (атIудай, сухдай яракьар) жуьреяр жагъана.
Шак фенвайди полициядин отделдиз агакьарна. Дуьздал акъудай яракьар экспертиза авуна ва, тайин хьайивал, гуьлле ядай яракь Макарован тапанчи я.
Тахсиркарвилин лишанриз килигна, РФ-дин УК-дин 222-статьядин 1-паюнай (къанунсуздаказ яракьар къачун, хуьн, санай масаниз тухун ва жував гваз хьун) уголовный дело къарагъарнава.
Чай хъуникди…
РД-дин МВД-дин пресс-къуллугъди мадни хабар гузвайвал, Махачкъаладин полициядин къуллугъчийри чкадин агьалидив масада чуьнуьхай автомобиль вахкана.
Алай йисан 4-апрелдиз Махачкъала шегьердин Кирован райондин полициядин отделдиз Семендер поселокдин 27 йисан яшда авай агьали арза ийиз атана. Ада алатай йифиз (3-апрелдиз) кIвалин патав акъвазарнавай вичин “ВАЗ-2106” улакь малум тушир касди чуьнуьхнавайдакай ихтилатна.
Полициядин къуллугъчийри вичел угъри яз шак физвай кас тайинарна: ам гьа и поселокдин 28 йисан яшда авай агьали я, зиян хьанвайдан дуст. Адан гафаралди, къейднавай юкъуз ада дустарихъ галаз чай хъвана. Ам вучтин чай тиртIа, малум туш. Амма чай хъвадай макъамда абурун арада векъи рахунар, гьуьжетар кьиле фена.
Гзаф хъел акатай дустуниз, кIваляй экъечIайла, иесидин машин акуна. Дустунин рикI тIарун патал ам рак куьлегдалди агал тавунвай машинда ацукьна ва улакь вичиз кIани чкадиз гьална. Шак фенвайда автомобиль са гьинал ятIани туна, дустунин зенгеризни жаваб ганач. Улакь жагъур хъувунва ва иесидив вахканва.
«Лезги газет»
