“Санал вахкузва. Аялрин диде-бубайри ЕГЭ вахкузвай югъ” вирироссиядин серенжемдин сергьятра аваз, 25-мартдиз Ахцегьрин 2-нумрадин школадин бинедаллаз тешкилнавай ППЭ-да (госимтигьанар кьабулдай пункт) школа акьалтIарзавай аялрин диде-бубайрин ЕГЭ хьана. РУО-дин начальник, филологиядин илимрин кандидат Халидин Эльдарован регьбервилик кваз серенжемдин руководитель, Ахцегьрин ООШ-дин директор Мейрам Рамазановади вичин куьмекчияр тир Нурудин Багъиров, Аким Алагьяров ва Рафидин Гьажиевни галаз виликамаз гьазурвал акунвай диде-бубайрин ЕГЭ вини дережада кьиле тухвана.
Имтигьанда 16 касди иштиракна (регистрация 66-да авунвай). Абуруз ЕГЭ кьиле тухунин къайдайрихъ (регистрация, инструктаж, телефонарни хсуси шейэр тун, бланкар ацIурун, ЕГЭ-дин материалар къачун, суалриз жавабар гун…) галаз мукьувай таниш жедай ва гьакI урус чIалай чпин чирвилер ахтармишдай хъсан мумкинвал хьана. Вири адетдин имтигьанра хьиз тир, анжах вахт 3-4 сятдилай са сятдал кьван тIимиларнавай. ЕГЭ-дилай кьулухъ диде-бубайрин умуми собрание хьана ва нетижаяр кьуна.
Диде-бубайрин ЕГЭ кьиле тухузвай гьал ахтармишун патал райондин кьилин везифаяр тамамарзавайди тир Роберт Гьамзаев ва депутатрин райсобранидин председатель Абдул-Керим Палчаевни атанвай. Абур рази яз амукьна.
— Вини дережадин тешкиллувал ава. Къе диде-бубайриз акуна хьи, аялривай секиндиз ва къулай шартIара чпин чирвилер къалуриз жеда. Кьилинди, имтигьан агалкьунралди вахкуз жедайвал, абуруз дурумлу чирвилер кIанда. Гьакъикъатда ина четин, секинсуз жедай хьтин кар авач, анжах школадин программа я. КIелзавай аялдиз, агалкьунралди имтигьанар вахкана, уьлкведин лап кесерлу вузрик экечIдай мумкинвал жезва. Мад вуч кIанда кьван? — лагьана абуру.
Дашдемир Шерифалиев
