9-классра кIелзавай аялрин арада лезги чIалай тухвай конкурсдин нетижаяр кьуна
“Лезги газетдин” алай йисан 9-мартдиз акъатай 10-нумрада ЦIийи Къурушрин хуьряй тир пенсияда авай муаллим Агъали Закирован “ЧIал гьикI хуьда?” макъала чапнавай. Ана мектебра 9-классра кIелзавай аялри тамамарун патал лезги чIалай ОГЭ-динни ЕГЭ-дин къайдада гьазурнавай тапшуругъар ганвай.
Редакциядив тапшуругърин суалрин дуьз жавабар агакьарай сифте пуд аялдиз Мансур Куьревидин “Етим Эмин: цIувай куз тахьай цIарар” ктабар пишкешзавай.
Къейд ийин хьи, газетдиз тапшуругъар гайидалай кьулухъ пуд гьафте кьван алатнатIани, редакциядив жавабар агакьарайди анжах са аял я: Махачкъала шегьердин 38-нумрадин гимназиядин ученица Амина Баламирзоева.
Ихьтин конкурсра иштиракун аялар патал лап важиблу я, абуруз хайи чIал дериндай чирунихъ галаз сад хьиз, чпихъ лезги чIалай авай чирвилерин дережа тайинардай мумкинвални жезва. Гьавиляй чна мектебра кIвалахзавай лезги чIалан муаллимриз аялар газетдин чинрал малумарзавай конкурсра иштиракунал желб авунин карда куьмек гуниз эвер гузва.
Винидихъ тIвар кьур конкурсдик 8 тапшуругъ квай. Амина Баламирзоевади виридаз дуьз жавабар гана ва ам “Етим Эмин: цIувай куз тахьай цIарар” ктабдиз лайихлу хьанва. Савкьат “Лезги газетдин” редакциядай вахчуз жеда.
Тапшуругърин жавабар: 1) Текст кIелун; 2) Кьежей, тарарин, къванеринни; 3) Хиялри тухванвай; 4) Къуллугъна, кьабулна, экв гуда; 5) Патав, кьулухъ; 6) — Ни; 7) Са нин ятIани, адаз; 8) Буьркьуьди артиллерист тир; 9) Къарагъай.
«Лезги газет»
