18-мартдиз Дагъустандин Кьил Сергей Меликова малумарай вири республикадин субботник, гзаф чкайра хьиз, Махачкъаладани хъсан тешкиллувал аваз кьиле фена. Меркездин мэр Ризван Гъазимегьамедова къейд авурвал, ана саки 5 агъзурдалай виниз ксари иштиракна. Республикадин газетринни журналрин издательстводин комплексни, гьа гьисабдай яз «Лезги газетдин» редакциядин коллективни, хийирлу и серенжемдикай къерех хьанач.  Субботник кьиле фейи югъни кIвалахар кьилиз акъудиз ашкъи къведайди, лугьудайвал, халис гатфаринди  тир.

Пакаман сятдин 10-даз журналистар, гъиле лазим алатарни аваз, издательстводин вилик кIватI хьана. Кьуранвай са шумуд тар субботник башламишдалди са югъ амаз атIанвай. Анаг михьи хъувуна. Къелемдин дус­тари гъиле перер кьуна, тарар атIанвай чкадиз пер яна. Дишегьлияр садбур цуьквер акIурунал, абуруз яд гунал, муькуьбур ла­гьайтIа, киреждалди тротуаррин къерехар асунунал машгъул хьана. Типографиядин дарамат галайвал авай тарарин танар киреждай асунна. Элкъвена вири мулкар зирзибилдикай михьна. Гьелбетда, хъуьтIяй акъатнавай, тIебиат уях жезвай береда тарарин кьурай хелни цуьрц атIунихъ, танар киреждай асунунихъ тIимил важиблувал авач. Багъ-бустанда кьиле тухузвай гьа ихьтин куьлуь-шуьлуь крарилай, чун рикI гваз эгечIунилай йисан бегьерни аслу я эхир.

Субботник чахъ фадлай авай хъсан адетрикай сад я. Ихьтин мярекатар тешкилуни чун элкъвена кьунвай тIебиат михьидаказ хуьз куьмекзава.

Михьивал женнетдай атанва лу­гьудай мисал, дугъриданни,   гьахълуди я. Ислендиз кIвала­хал­ къведайла, меркездин гьар са чка михьидаказ акурла, рикIиз лап хуш ва гуьгьуьлар шад жезвай.

Рагнеда Рамалданова