21-мартдиз Дагъустандин Кьил Сергей Меликов Роскачестводин регьбер Максим Протасовахъ галаз гуьруьшмиш хьана. Абур регионди ва еридин милли системади санал кIвалахунин асул рекьерикай рахана.
Алай вахтунда, “Россиядин чехиррин гид” проектдин сергьятра аваз, Дагъустандин чехирчивилин карханайри, месела, Дербентдин коньякрин комбинатди, и шегьердин чехирчивилин компанияди ва газ квай чехиррин заводди Роскачестводихъ галаз санал кIвалахзава.Абурун чехирчивилин суьрсетдиз пешекарри виниз тир къимет ганва ва абур, “Рычал-Су” ятар хьиз, Роскачестводин рейтингда гьатнава.
Сергей Меликова идалай вилик къулар чIугур икьрардихъ регион патал авай важиблувал кьетIенди тирди къейдна ва республикадин бизнесдини Роскачестводи алакъаяр мадни сихбур авуник умуд кутуна.
“Саналди тир планар инлай кьулухъни уьмуьрдиз кечирмишун патал чна рекьерин карта гьазурнава. Ада государстводин ва алишверишдин карханайриз вичин суьрсет Роскачестводин стандартрал бинеламиш тирди тестикьардай мумкинвал гузва. Ида лагьайтIа, абуруз международный базардани артуханвал арадал гъида. Чаз виридаз чизва хьи, “Кеферпад-Кьиблепад” коридорди Дагъустан патал цIийи мумкинвилер ачухзава. Гьеле исятда амаз Дагъустандин продукциядихъ мукьвал тир къецепатан ва Персидский заливдин патав гвай уьлквейрай тир амадагрин патай игьтияж, гьакI Китайдихъ галаз кIвалахдин рекьяй алакъаяр тайинардай мумкинвални ава. Гьелбетда, еридин жигьетдай истемишунриз жаваб гузвай ва талукь тир лишан алай суьрсет амайбурулай фад маса гуз жеда. Кьилдин фикир чи майвайринни емишрин суьрсетдал желб ийиз кIанзава — ам экологиядин жигьетдай михьиди я ва адавай “къацу стандартдик” умуд кутаз жеда. Вични неинки тазазмаз, гьакIни гьазурнавай суьрсетдин къайдада аваз. И хел чун исятда еримлу ийиз алахънава”, — баянар гана Сергей Меликова.
Максим Протасова малумарайвал, Роскачестводи Дагъустандин карханайриз РФ-дин гьукуматдин еридиз талукь премиядин сергьятра аваз кьиле тухузвай бизнес-гьерекатар ахтармишунин карда куьмек гуда.
“И кIвалахдин ва чи пешекаррилай къвезвай меслятар ишлемишунин нетижада компанийрин зегьметдин бегьерлувал, экономикадин жигьетдай хийирлувал виниз хьанвайди тестикьарзава. Вири уьлкведин 4 агъзурдалай гзаф тешкилатри адакай хийир къачунва. ГьакIни чна тIебии производство виликди тухунин ва карханаяр “Гьалал” стандартдиз жаваб гунин жигьетдай ахтармишунин кIвалахрин план туькIуьрнава. Ида ахьтин суьрсет къецепатан уьлквейра маса гуз куьмекда”, — лагьана тешкилатдин руководителди.
2015-йисалай инихъ Роскачестводи метягьдин аслу тушир ахтармишунар кьиле тухузва. Абурун нетижайралди виридалайни хъсан шейэриз Россиядин еридин лишан гузва. Ида абуру неинки законодательстводин, гьакIни Роскачестводин винизбур тир стандартриз жаваб гузвайди заминламишзава. Ихьтин ахтармишунрик 200 жуьредикай тир 9,5 агъзур шей акатнава.
Чи мухбир
