21-мартдиз Дагъустандин Кьил Сергей Меликов мергьяматлувилин тешкилатрин “Регьимлувилин дустар” Ассоциацияди форумда иштиракна, ам республикадин коммерциядинбур тушир тешкилатрин векилрихъ галаз гуьруьшмиш хьана.
Мярекатдал коммерциядинбур тушир тешкилатрин 2022-йисан кIвалахдин нетижаяр кьуна ва республикадин яшайишдин месэлаяр веревирдна. Форумдин кьилин тема урбанизациядин, яни общество вилик финал гьалтайла, шегьердин культура ва “шегьердин алакъаяр” вилик фининди шегьеррин агьалийрин кьадар хуьреринбурулай артух хьунин месэла тир.
Вичин телеграм-каналда регионди регьберди и гуьруьшдиз баянар ганва.
“Ибур зун патал еке важиблувал авай гуьруьшар я. Жуван хийирдикай фикир тавуна ва чандилай гъил къачуна, аялриз, кIеве авайбуруз куьмек гуз гьазур ва яшайишдин рекье чпихъ метлеб авай проектар кьилиз акъудзавай инсанрал за рикIивай гьейранвалзава. Абуруз неинки Дагъустан рикIивай кIан я, абуру хайи макан вилик фин ва абад хьун патал чпелай алакьдай вири крар ийизва. Мисал яз, къенин форум тешкилнавай “Регьимлувилин дустар” мергьяматлувилин тешкилатрин Ассоциацияди йиса саки 900 агъзур касдиз куьмекар гана!
НКО-дин кIвалахдихъ пандемиядин вахтундани важиблувал хьана, къенин юкъузни военный рекьяй къуллугъчийриз, абурун хизанриз рикIин эмирдалди куьмекар гузва, абурун патахъай къайгъударвал чIугвазва.
Мад са мисал — са шумуд югъ идалай вилик чна саналди Сириядин Арабрин Республикадиз гуманитарный еке куьмек рекье туна. Им гражданвилин инициативайрин ва гьукумдин къурулушдин къуватар сад авунин чешне я. Гуманитарный куьмек кIватIай вири ксариз заз мад сеферда сагърай лугьуз кIанзава!
Обществодин вири къуватар сад тавунмаз, дуьзгуьн общественный диалог ва и карда иштиракдай майилвал авай ксар галачиз, республика вилик финикай рахаз жедач.
Мукьвал вахтара чна гражданвилин инициативайриз куьмек гудай Центр кардик кутада. Ада региондин яшайишдин рекьяй метлеблу проектар кьилиз акъудиз ва чкадин НКО-риз куьмекда”,- кхьенва Сергей Меликова.
Чи мухбир
