Меркезда “Терроризмдиз информациядин аксивал авун” темадай РД-дин “ИКЦ” ГБУ-ди тешкилнавай махсус семинар кьиле фена. Ана РД-дин информациядин ва печатдин агентстводин, республикадин изданийрин, телевиденидин руководителри, муниципалитетрин информациядин такьатрин, ОТК-дин, МВД-дин, жемиятдин векилри иштиракна.
“ИКЦ” ГБУ-дин регьбер Мухтар Амирова, семинар ачухуналди, алай аямда терроризмдин ва экстремизмдин идеология чи уьлкведин агьалийрин, иллаки жегьилрин, арада гегьеншарзавай къуватар секин тахьанвайдакай, абуру жаванар, жегьилар чпиз муьтIуьгъарун, гьукумдиз акси гьерекатрал желб авун патал ишлемишзавай жуьреяр артух жезвайдакай ва информациядин такьатар ихьтин вахтунда вини дережада хьана кIанзавайдакай, терроризмдиз акси кIвалах тухун важиблу тирдакай лагьана.
РД-дин информациядин ва печатдин агентстводин руководителдин сад лагьай заместитель Наида Мегьамедовади терроризмдин идеологиядиз информациядин жигьетдай тухудай акси кIвалахдин къайдайрикай, республикадин СМИ-ри и месэладиз талукь яз кIватIнавай тежрибадикай ва терроризмдинни экстремизмдин гьакъикъи мурадар, гьерекатар къалурун патал гьазурнавай информациядин такьатрикай (ктабар, видеороликар, брошюраяр, макъалаяр…) лагьана. Важиблу темадай яратмишзавайбурун арада гьар йисуз конкурс малумарзава ва адан нетижаяр йиса кьве сеферда кьазва. Конкурсда республикадин, муниципалитетрин, аслу тушир вири изданийрин журналистри иштиракзава. Алатай йисуз, мисал яз, 16 кас пулдин пишкешриз, дипломриз, призриз лайихлу хьана.
РД-дин МВД-дин ЦПЭ-дин экстремизмдиз информациядин рекьяй акси кIвалах тухудай отделдин оперуполномоченный Сабина Сункъулиевади ЦПЭ-ди массовый информациядин такьатрихъ галаз санал тухузвай кIвалахдикай суьгьбетна. Ада лагьайвал, алай вахтунда терроризмдин, экстремизмдин идеологри, социальный сетрикай, интернетдикай менфят къачуз, жегьилрин кьилер элкъуьрзава, абур уьлкведиз, гьукумдиз акси гьерекатар авунал гъизва. Интернетда чапзавай кьван тапан хабаррихъ агъазвайбур гзаф я. Абуру кьил элкъуьрзавай жаванар тахсиркаррин жергейрани гьатзава. Мисал яз, шаз, школайрин дараматрик минаяр, бомбаяр кутунва лугьуз, абур вахтуналди агалдай чкадал гъана. Гьелбетда, тахсиркарар жазадив агакьарна.
Семинардал кар алай месэладиз талукь гегьенш ва менфятлу рахунар авуна.
Хийир Эмиров
