РД-дин экономикадин ва мулкар виликди тухунин министерстводи хабар гузвайвал, республикадин “Чкайрилай теклифар” ва “Аялрин бахчаяр бинедилай ремонт авун” проектра 2023-йисуз иштиракун патал арзаяр кьабулдай вахт 31-мартдалди давам жеда. РикIел хкин, и жигьетдай арзаяр кьабулиз алукьнавай йисан январдилай башламишнай.
“Чкайрилай теклифар” проект республикада 2019-йисалай гъиле кьунва. Адан макьсад жемиятдин къурулушар виликди тухунихъ галаз алакъалу четин месэлаяр гьялунин карда чкадин самоуправленидин органриз ва жемятдиз куьмек гуникай ибарат я.
Алай йисуз «Чкайрилай теклифар» проект уьмуьрдиз кечирмишун патал республикадин бюджетдай 200 миллион манат чара авун фикирда кьунва.
Проектда иштиракунин асул шартI адакай ибарат я хьи, ам кьилиз акъуддайла чкайрин (районрин, хуьрерин) бюджетрай, гьакIни меценатрин (гуьгьуьллубурун, чпин хушуналди и рекьиз пул гузвай ксарин) гьисабдай тайинарнавай кьадар такьатар чара авун чарасуз я. И шартI исятдани авайвал ама. Гьа са вахтунда чкайрилай къвезвай теклифар уьмуьрдиз кечирмишунин рекьиз субсидияр ахъаюнин къайдадик са жерге дегишвилер кутунва.
Кьилди къачуртIа, проектдин сергьятра аваз алай аямдив кьадайвал туькIуьриз жедай жемиятдин къурулушрин объектрин сиягьда дегишвилер ава: и сиягьдик умуми образованидин организацияр ва абурун тIуьн гудай блокар алай мулкар аваданламишун кутунва.
РикIел хкин, арзаяр хуьрерин ва шегьеррин администрацийри гунин шартIунал амал авурла, бюджетдай чара ийизвай кьадар такьатар, республикадин бюджетдай гузвай субсидиядин кьадардив гекъигайла, 3 процентдилай тIимил тахьун лазим я. Ихьтин арзаяр муниципальный районрин ва шегьеррин округрин тIварцIелай атайла, — 6 процентдилай.
Чара ийизвай субсидийрин вини кьилин кьадар жеда: 5 миллион манатдал кьван — хуьрери уьмуьрдиз кечирмишзавай проектриз, 10 миллион манатдал кьван — муниципальный районри ва шегьеррин округри уьмуьрдиз кечирмишзавай проектриз.
Проектар кьилиз акъудунин карда бюджетрилай къерехдай тир чешмейрин иштираквал анжах нагъд пулунин къайдада (проект кьилиз акъудуниз акъатзавай такьатрин умуми кьадардин 15 процентдилай тIимил тушиз) фикирда кьунва.
“Аялрин бахчаяр бинедилай ремонт авун” проект Дагъустанда алатай йисалай гъиле кьунва ва адан макьсад республикадин мектебриз фидалди аялар кьабулдай идараяр авай гьал хъсанаруникай ибарат я.
Алай йисуз проект уьмуьрдиз кечирмишуниз республикадин бюджетдай 300 миллион манат чара авун фикирда кьунва.
Теклифралди кьилиз акъудзавай маса проектрилай тафаватлу яз, “Аялрин бахчаяр бинедилай ремонт авун” проектда бюджетдилай къерехдай тир такьатар желб авунин къайда ишлемишзавач.
Гъиле кьадай проектар конкурсдин бинедаллаз хкяда. Ам кьиле тухудай къайда РД-дин гьукуматди 2022-йисан 8-апрелдиз кьабулай 81-нумрадин къарарда къейднава.
Са проект кьилиз акъудун патал республикадин бюджетдай чара ийидай субсидиядин кьадар мектебдиз фидалди аялар кьабулдай идарадин проектдин гужлувилелай аслу жеда.
Чкайрин бюджетрай чара авун лазим тир финансрин кьадар, республикадин бюджетдай чара ийидайдав гекъигайла, 5 процентдилай тIимил тахьун лазим я. И проектда иштиракун патал арзаяр 21-мартдалди кьабулда.
Чи мухбир
