Малум тирвал, 2023-йис Расул Гьамзатов дидедиз хьайидалай инихъ 100 йис тамам хьунин юбилейдинди я. Дагъларин уьлкведа и вакъиадиз талукьарнавай гзаф кьадар серенжемар ва шад мярекатар кьиле тухун пландик ква…
Россиядин Яшайишдин фондунин Дагъустанда авай Отделенини (ОСФР) къерехда акъвазнавач. Пресс-къуллугъди хабар гузвайвал, ОСФР-дин РД-да авай муьштерийрив къуллугъар агакьардай идарайра виридалайни хъсан пIипI тешкилунин серенжем кьиле тухузва. ИкI, чи республикада кардик квай 51 идарадани шаирдин уьмуьрдихъ ва яратмишунрихъ галаз танишарзавай милли гуьрчег пипIер туькIуьрнава. Мисал яз, Расул Гьамзатован хайи Хунзах райондин муьштерийрив къуллугъар агакьарзавай идарада (шикилда) аудиоаппаратурани эцигнава. Иниз къвезвай муьштерийривай чпин машгьур ватанэгьлидин виридалайни хъсан эсеррихъ яб акализ жезва.
Меркезда фондунин Отделенида Расул Гьамзатован шикил ва машгьур шиирар — “Дурнаяр”, “Диде”, “Дустар хуьх”, “Заз дяве кIандач”, “Мне ль тебе, Дагестан мой былинный” алаз еке баннер алкIурнава.
Шаирдин юбилейдиз талукьарна, “Расул Гьамзатован шиирар кIелзава” литературадин марафон кьиле тухунни пландик ква. Ана идарадин кьиле авай ва шиирар кIелунал рикI алай вирибурувай иштиракиз жеда.
«Лезги газет»
