Дагъустан Республикадин Кьил Сергей Меликова 6-мартдиз йикъан месэлайриз талукь совещание кьиле тухвана. Мярекат ачухай ада РД-дин тIебиатдин ресурсрин ва экологиядин министерствода, карчивилин ва инвестицийрин рекьяй агентствода цIийи ксар къуллугърал эцигнавайдакай малумарна.
РД-дин тIебиатдин ресурсрин ва экологиядин министрдин везифаяр вахтуналди Александр Зиминика тамамарзава. Адал къведалди и къуллугъдал Ибрагьим Ибрагьимов алай. Идалайни гъейри, региондин Кьили вичин указдалди РД-дин карчивилин ва инвестицийрин рекьяй агентстводин руководителдин къуллугъдал Гьуьсейн Гьуьсейнов тайинарна. Виликдай и къуллугъдал Артем Хрюкин алай.
Дагъустандин Кьили гъавурда турвал, гьукумдин органра кьиле тухвай и дегишвилер тайин пландихъ ва кIвалахдин менфятлувал хкажунихъ галаз алакъалу я.
Военный чуьруькрин иштиракчийриз ва абурун хизанриз куьмекар гун патал цIийиз тешкилзавай властдин органдин гьакъиндай малумат РД-дин Гьукуматдин Председатель Абдулмуслим Абдулмуслимова гана.
Дагъустандин зегьметдин ва яшайишдин рекьяй вилик финин министерстводиз талукь цIийи центради женгерин гьерекатра иштиракай ксариз куьмек гудайвал я. Ада гьакI военный махсус серенжемдин, Афгъанистандин дяведин, Венгрияда ва Чечен Республикада кьиле фейи вакъиайрин иштиракчийрихъ галаз кIвалахда.
Центрадин устав кьабулнава, къурулуш ва кIвалахдайбурун кьадар тайинарнава. Амай вири герек серенжемарни са куьруь вахтунда бегьемарда.
— Военный чуьруькрин иштиракчийриз ва абурун хизанриз яшайишдин рекьяй куьмек гудай цIийи центради и рекьяй менфятлудаказ кIвалахда, — къейдна Дагъустандин Кьили.
“Дагъустанда ветеранрин дережа авай гзаф инсанар яшамиш жезва. Регионда ветеранрин организацияр гзаф аватIани, гьайиф хьи, абуру тешкиллудаказ лазим ксариз куьмек гузвачир. Гила и къурулушда кIвалахдай дуьзгуьн пешекарар жагъурна кIанда”, — лагьана региондин регьберди.
РД-дин Кьилин ва Гьукуматдин Администрациядин руководителдин заместитель, РД-дин Кьилин информациядин сиясатдин ва пресс-къуллугъдин управленидин начальник Рашид Акавова лагьайвал, республикадин Кьилин тIварцIихъ атай 2 агъзур арзадиз талукь яз серенжемар кьабулнава.
“Делилрин бинедаллаз лугьуз жеда хьи, 1979 арза гуьзчивилик кутунва. 926 арзадиз талукь яз серенжемар кьабулнава, бязибуруз гъавурда твазвай чарар кхьенва, 1053 арза гьелелиг гуьзчивилик кума”, — лагьана Р.Акавова.
Мярекатдал Сергей Меликова шегьеррин ва районрин администрацийрин кьилерал агьалийрилай арзаяр кьабулдай хсуси линияр ачухун тапшурмишна. Региондин Кьили ихьтин кIвалахдин менфятлувал къейдна. Ида чкайрал жезвай крарикай вахтунда хабардар авуниз ва инсанрик секинсузвал кутазвай месэлаяр гьялуниз куьмек гуда.
Лап и мукьвал вахтара муниципалитетрин регьберри дуьм-дуьз эфирда агьалийрин суалриз жавабар гун лазим я.
Чи мухбир
