Алатай вацран эхиримжи са шумуд юкъуз Хасавюртда боксдай республикадин кIвенкIвечивал къазанмишун патал 2007-2008-йисара дидедиз хьайи жаванрин арада кьиле фейи акъажунра 230-далай виниз боксерри чпин гъутарин устадвал къалурна. Абурун арада СтIал Сулейманан райондин спортсменарни авай.
И сефердани абуру чпин къастунал кIевивал, техникадин рекьяй хъсан гьазурлухвал ва викIегьвал вини дережада аваз къалурна. ИкI, РД-дин Кьиблепатан зонадин старший тренер Альберт Межидован гъилик вердишвилер къачузвай Артём Агъамегьамедова (60 кг) ва Ильхан Эзбербегова (80 кг-дилай артух заланвал авайбурун арада) — 1, Агьмедагъа Шамсудинова (60 кг) 2-чкаяр кьуна. Гила абуру СКФО-дин кIвенкIвечивал патал акъажунриз гьазурвал аквазва.
«Лезги газет»
