Савдадин икьрар тестикьарна

Россиядини Саудовский Аравияди нафтlадихъ галаз ала­къа­лу ОПЕК+ икьрардин муддат артухар хъувуна. РФ-дин энергетикадин министр А.Новака ТАСС-диз малумарайвал, икьрарда гьар гьихьтин вахтунда хьайитlани нафт хкудунин кар къайдада тун теклифнава.

Министрдин гафаралди, и месэла икьрардин муькуь иштирак­чийрихъ галазни веревирд ийида. “Муькуь иштиракчийрини икьрардин муддат артух хъувун патал виликамаз малумарнава. Са­да-садахъ галаз алакъалу яз кар авунин къайда тайинарун лазим я”, — къейдна Новака.

22-23-июндиз Венада кьиле фидай гуьруьшдал муькуь уьлквейрини ОПЕК+ икьрар веревирдда. Алай йисан майдиз Британиядин ВР тешкилатди раижайвал, 2040-йисара къецепатан уьлквейриз мал ракъурунин жигьетдай Россия дуьньяда сифте жергедин энергоресурс яз амукьда.

Крым Россиядинди я лагьана

США-дин президент Дональд Трампа Канадада кьиле фейи G7 саммитда дуьньядин муькуь уьлквейрин регьберриз вичи Крым Россиядинди яз гьисабзава лагьана. Идакай Америкадин Buzzfeed чешмеди хабар гузва.

“Трампа Крымдин вири агьалияр урус чlалал рахазвайвиляй саммитдин иштиракчияр тир регьберриз анаг Россиядинди я лагьана”, — къейднава чешмедин малуматда.

Идалайни гъейри, Трампа Украина дуьньяда виридалайни гзаф коррупция авай уьлкве тирди лагьана. Чешмеди кхьиз­вайвал­, ихьтин фикирар раижунихъ США-ди Крымдизни Украинадиз та­лукь яз чпин рафтарвилер дегишунин лишанар аваз хьунни мум­кин я. Амма Америкадин регьбердин келимаяр зарафатдинбур яни, гьакъикъибур яни — идай чешмедивай кьил акъудиз хьанвач.

Кремлдин къейд

Россиядин пресс-секретарь Д.Пескова США-дин президент Д.Трампа Крым Россиядинди я лагьай BuzzFeed чешмедин малуматдал шак гъизва. Кремлдин векилдин гафар “Хабарар” РИА-ди раижнава.

“Тапан хабаррин кьадар гзаф я, баянарни гун герек жезвач, вучиз лагьайтlа а делилрин дуьзгуьнвал чаз чизвач. Гьел­бетда, ихьтин хабаррин якъинвилин дережадин пата­хъай­ни чавай са затlни лугьуз жедач”, — малумарна Пескова­.

Шаклу хабар пайда хьайидалай кьулухъ Лацу кIвалин пресс-секретарь Сара Сандерса къейд авурвал, адаз Трампа Крымдин гьакъиндай лагьанвай гафарикай гьич са хабарни авач.

Крым Россиядик 2014-йисуз референдумдин нетижайрал асаслу яз акатна. Киевди ва Рагъакlидай патан уьлквейри референдумдин нетижаяр гьисаба кьунач.

Гъуьлягъди дишегьли туькьуьнна

Индонезиядин Сулавеси островда муьжуьд метрдин яргъивал алай чlехи гъуьлягъдин къеняй дишегьлидин жендек­ жагъана. Идан гьакъиндай Jakarta Post чешмеди хабар гузва.

Чкадин полициядин начальникди малумарайвал, 54 йисан яшда авай дишегьли Ва Тиба 14-июндин нянрихъ квахьна. Ам кlва­ливай са километрдин яргъа авай гьажибугъдайрин таладиз фе­най. Дишегьли кlвализ хтун тавуникди пакадин йикъан экуьнахъ хизанди къалабулух къачуна. Тиба­дихъ­ къекъвез фейи адан вахаз фонарь, кlвачин къапар, чlе­хи чукlул ва маса гелер жагъана. И агьвалатрилай кьулухъ ада чкадин агьалийривай куьмек гун тlа­лабна. Са шумуд сятда къекъвейла, абуруз руфун уф турди хьиз дакlунвай чlехи питон акуна. Агьалийриз чlехи гъуьлягъдин къеняй квахьнавай дишегьлидин жендек жагъана.

2017-йисуз Индонезиядин агьалиди вичи ирид метрдин яргъи­вал алай питон текдиз кьейидакай ихтилатна. Адан гафаралди, гъуьлягъди рекьяй физвай кьве касдиз манийвал гузвай, гьавиляй­ ада абуруз куьмекун кьетlна. Текдиз гъуьлягъ рекьиз хьа­­на­тlа­ни, хирер хьуникди агьали азарханадиз аватна.

Нубатдин ягъунар

США кьиле аваз са жерге уьлквейрин коалицияди Дайр-эз-Заур вилаятда Сириядин кьушунриз ягъунар кьуна. Идакай Сириядин SANA хабаррин агентстводи малумарна.

Чешмедин делилралди, женгерин гьерекатрикди са шумуд касдал хирер хьана, кьейибурни ава.

Пентагонди гуя и хабар тапанди я лагьана. “Им США-ди ва я коалицияди кьилиз акъудай женгинин гьужум туш”, — малумарна Америкадин военный тешкилатдин векил Эдриана “Хабарар” РИА-диз.

Рикlел хкин, 14-апрелдиз США-ди, Великобританияди ва Фран­цияди, гуя химиядин яракьар гьазурзавай ва хуьзвай чкаяр я лугьуз, Сириядин объектрал саналди гьужумнай.

Рагъакlидай патан уьлквейри арадал атай гьаларин патахъай­ жавабдарвал Сириядин аскеррин хиве туна. Россиядин терефди химиядин яракь ишлемишунихъ галаз алакъалу яз раиж­завай хабарар къалмакъал тун патал чукlурзавайбур яз гьисабзава.

Гьазурайди — Куругъли Ферзалиев