Мукьвара зун вичин тlвар фадлай малум тир са лайихлу лезгидихъ галаз “Фейсбук” соцсетда таниш хьана. Ам пешедал рикl алаз кlвалахзавай, вичихъ агалкьунар, машгьурвал ва нуфузлувал авай пешекар журналист, мад са шумуд хиляй алакьунар авай жегьил инсан я.
Зи ихтилат Дагъларин уьлкведивай вичел дамах ийиз жедай, алай вахтунда Москвада яшамиш жезвай ва ина кlвалахзавай Алаудин Насирович Ярагьмедовакай я. Ам 1981-йисан 26-декабрдиз Махачкъалада къуллугъчидин хизанда дидедиз хьана. Мектеб куьтягьайдалай кьулухъ ам ДГУ-дин филологиядин факультетдин журналистикадин отделенидик экечlна ва 2005-йисуз анаг куьтягьна.
Алаудин Ярагьмедова 2005-2006-йисара Воронеж шегьерда армиядин жергейра — Россиядин МВД-дин къенепатан кьушунра къуллугъна. Журналистикадин рекьяй кьилин образование авай жегьил пешекар “Женгерин сергьятдал” тlвар алай военный журналдин редакциядиз рекье туна, гуьгъуьнлай Россиядин МВД-дин ВВ-дин “Гьал” тlвар алай газетда военный корреспондент яз кlвалахна, гьа са вахтунда “Братишка” журналдихъ галазни сих алакъайра хьана.
Тежриба кlватlай къелемчиди 2006-2007-йисара “Дагъустанда Московский комсомолец” газетдин хсуси корреспондент яз, республикадин рекламайрин “Дагъустанда бизнес-газет” изданидин кьилин редактордин заместитель яз кlвалахна.
2007-2008-йисара диндин рекьяй Дагъустан Республикадин Гьукуматдин комитетдин информациядинни аналитикадин отделдин кьилин пешекар яз, кьилдин тешкилатдиз талукь тир “Дагъустандин кадастрдин хабарар” газетдин кьилин редактор яз кlвалахна; 2008-2012-йисара “Россиядин таджикар” газетдин корреспондент, www.tajinfo.ru сайтдин шефредактор, “Таджикистан” журналдин кьилин редактордин заместитель, “Таджикский Медиа Холдинг “TAJINFO” ЗАО-дин генеральный директор хьана. 2012-2013-йисара адакай Москвада “Дагъустан” РИА-дин хсуси корреспондент, РФ-дин Федеральный Собранидин Госдумада ва Федерациядин Советдин обозреватель, 2013-2015-йисара СНГ-дин ватандашрин крарин рекьяй федеральный агентстводин ва гьукуматдинбур тушир тешкилатрихъ галаз алакъалувилелди кlвалахунин рекьяй управленидин отделдин меслятчи, 2015-2017-йисара Трабзон шегьерда РФ-дин Генеральный консульстводин атташе хьана.
2014-йисуз ада “Протокол ва адет хьанвай къайда: дипломатвилин, кардин, умуми ватандашвилин” программадай Россиядин МИД-дин Дипломатический академияда пешекарвилин дережа хкаждай курсара кlелна. РФ-дин къецепатан крарин министерстводин къецепатан чlаларин кьилин курсара хьайидалай кьулухъ адав 2014 ва 2017-йисара имтигьанрин комиссиядин къарардалди туьрк ва ингилис чlалар пешекарвилин дережада чизвайдан гьакъиндай шагьадатнамаяр вахкана.
2017-йисалай къенин йикъалди РФ-дин алвердинни промышленностдин палатадин патав гвай Россиядинни Туьркиядин ва Россиядинни Катардин карчивилин советрин председателдин, “Акрополь” тешкилатрин президентдин меслятчи я.
Чи ватанэгьлидин лайихлувилер Россиядин МИД-ди, Россотрудничестводи, динрин рекьяй РД-дин Гьукуматдин комитетди, РФ-дин журналистрин Союзди, Москвадин регионрин арада авай алакъайрин ва милли сиясатдин комитетди, Россиядин Общественный палатади, Вирироссиядин ветеранрин тешкилатди, Россиядин къенепатан крарин ва кьушунрин органрин женгерин гьерекатрин ветеранрин ассоциацияди, Кавказдин халкьарин Россиядин конгрессди ва “Цlийи технологияр” ОНО-ди гьуьрметдин грамотаяр гуналди къейдна. Чи фикирдалди, ихьтин нуфузлу къурулушринни тешкилатрин патай гьуьрмет къазанмишнавай касдин бажарагълувални тежрибалувал, инсанпересвални намуслувал вини дережада ава.
Ам “Жегьилрин информациядин агентство” АНО-ди Москвадин хизанрин ва жегьилрин сиясатдин департаментдин куьмекдалди тухвай конкурсдин лауреатни я. 2013-йисуз РФ-дин гьукуматдин гражданский къуллугъдин меслятчивилин чин гана. Хайи чlалалайни урус чlалалай гъейри, адаз туьрк ва ингилис чlаларни хъсандиз чизва.
Алаудина уьмуьрдин юлдашдихъ галаз кьве аялдиз тербия гузва. Алай вахтунда ам Россиядин журналистрин Союздин ва Вирихалкьарин журналистрин союзрин конфедерациядин, 2013-йисалай РФ-дин Президентдин патав гвай РД-дин гьамишалугъ векилханадин общественный советдин член я.
Къуй чи лайихлу ватанэгьли агалкьунрин гурарай мадни зурба кукlушриз хкаж хьурай!
Гьазурайди — Куругъли Ферзалиев
