Советрин Союздин Игит Абас Исрафилован тIварцIихъ галай Белиждин гимназияда Афгъанистандай Советрин кьушунар акъудай ва Ватандилай къецепата къуллугъдин везифаяр тамамарайбур рикIел хкизвай югъ къейдна.
Ана Дербент, Дагъустандин Огни шегьеринни Дербент райондин военный комиссардин заместитель Ахрасиб Амова, Белиж поселокдин кьилин заместитель Абдулгьамид Ражабова, дяведин, зегьметдин, яракьлу ва къанун-къайда хуьдай органрин ветеранрин советдин председатель Гьуьсейн Яхшибаева, райондин культурадин, жегьилрин сиясатдин ва туризмдин управленидин начальник Эльдар Османова, Россиядин ветеранрин жемиятдин «Боевое братство» тешкилатдин Дербентдин отделенидин векилри, афгъанви ветеранри, гимназиядин юнармецийрин дестеди, муаллимри ва аялри иштиракна.
Мярекат ачухай гимназиядин директор Нариман Шихмегьамедова лагьана: “Къе чун Афгъанистанда кьиле фейи вакъиаяр рикIел хкиз кIватI хьун дуьшуьшдин кар туш. Гимназия Советрин Союздин Игит Абас Исрафилован тIварцIихъ гала. Чна адал дамахзава”.
Адан гафарилай гуьгъуьниз Россиядин Гимн тамамарна.
Ахрасиб Амова, Советрин Союздин Игит лагьай тIвар ганвай афгъанви аскеррин жергедай Абас Исрафилов багъри Ватанда кучукун кьисмет хьанвай анжах сад, Кеферпатан Кавказда, Игитвилин гъед вичиз такуна, кучукнавай тек сад тирдини къейдна.
— Ватан патал къалурай кьегьалвилер гегьеншдиз къейд авунихъ еке метлеб ава. Иллаки алай вахтунда, Украинада кьиле физвай махсус серенжемда иштиракзавайбуруз чун чпихъ галайди чир жедайвал. Гимназиядин коллективдиз аялар Игит Абасан чешнейралди ватанпересар яз тербияламишунай, баркалла! — лагьана А.Амова.
Ахпа анал Абдулгьамид Ражабов, Гьуьсейн Яхшибаев, Эльдар Османов, шаир, гимназиядин лезги чIалан муаллим Гъулангерек Ибрагьимова ва масабур рахана. Абурун виридан фикир сад тир: кьегьал рухвайрин игитвилерал дамах авун, акьалтзавай несилдиз ватанпересвилин тербия гун, махсус серенжемда иштиракзавайбуруз куьмекун.
Аскервилин буржи тамамардайла, телеф хьайи вири женгерин иштиракчийрин къаматар рикIел хуьнин лишан яз, са декьикьада кисна акъвазна.
Аялри ватанпересвилин манияр тамамарна, кьуьлерна.
Къагьриман Ибрагьимов
