20-февралдиз Махачкъалада, ДГПУ-дин филологиядин факультетда, Дагъустандин вузра филологиядин факультетра кIелзавай лезги студентрин арада лезги публицистикадай конкурс кьиле фена. Мярекат тешкилайбурун арада Алкьвадар Гьасанан тIварцIихъ галай медениятдинни марифатдин центр, ФЛНКА ва “Лезги газетдин” редакция авай.

Конкурсда, санлай къачурла, ДГУ-дай ва ДГПУ-дай 31 студентди иштиракна. Мягь­тел жедай кар ам я хьи, ДГУ-дин фи­лологиядин факультетдин журналистикадин отделенидай конкурсдиз са касни атан­вачир. Чахъ авай делилралди, ана кIел­завайбурун арада лезги студентарни ава, амма, вучиз ятIани, абуру мярекатда иштиракнач.

Конкурс ачухуниз талукьарнавай паюнин сергьятра аваз “Лезги газетдин” кьилин редактор, Алкьвадар Гьасанан тIва­р­цIихъ галай центрадин директор Мегьамед Ибрагьимов, ДГПУ-дин профессор Шайдабег Мирзоев, РД-дин Общественный палатадин Комитетдин председатель Ислам Мегьамедов, Лезги радиодин редактор Наира Рамазанова, “Лезги газетдин” кьилин редактордин заместитель Куругъли Фер­залиев ва масабур рахана. Абуру конкурсдихъ хайи чIал хуьнин, вилик тухунин, студентрин арадай публицистикадин ре­кьяй­ алакьунар авайбур хкягъунин жигьетдай авай важиблувал къейдна ва иштиракчийрихъ агалкьунар хьун алхишна.

Конкурс М.Ибрагьимовани К.Ферзалиева кьиле тухвана. Абуру студентар кIва­лахдив эгечIдалди вилик очеркдин тема малумарна:  “Республикада яшайишдин шар­тIар хъсанарун патал вуч авун герек я?”. Яни иштиракчийриз конкурсдин тема виликамаз чирнавачир. Макъала кхьин патал абуруз са сят вахт ганвай.

КIвалахриз къиметар гайидалай кьулухъ гъалибчийрин тIварарни тайин хьана­.

ИкI, 1-чка — ДГУ-дин филологиядин факультетдин урус ва Дагъустандин чIала­рин отделенидин 3-курсунин студентка Лезгият  Шагьпазовади, 2-чка — ДГУ-дин фи­лологиядин факультетдин урус ва Да­гъустандин чIаларин отделенидин 3-курсунин студентка Салминат  Разахановади, 3-чка — ДГПУ-дин филологиядин факультетдин 2-курсунин студенткаяр тир  Милена  Агьмедовадини  Хадижа  Гьажиевади  ва ДГУ-дин филоло­гия­дин факультетдин 2-курсунин студент­ка  Пилижат  Мисрихановади  кьуна.

Гъалибчийриз, чкайриз килигна, 30, 20 ва 10 агъзур манатдин кьадарда аваз  пулунин пишкешар, дипломар, «Къуръандин аятрин манаяр — лезги чIалал», «Лезги газетдин — 100 йис» ктабар гана.

КIвенкIвечи чкаяр кьурбурув шабагьар­ вахкунин мярекатда Мегьамед Ибрагьимова, Куругъли Ферзалиева, ДГПУ-дин про­ректор Руслан Гереева ва ДГПУ-дин фи­лологиядин факультетдин декан Руслан Къадимова иштиракна.

Къейд ийин хьи, тешкилатчийрихъ и мя­­рекат гьар йисуз кьиле тухудай ниятар ава.

Конкурсдин нетижаяр кьуналди, “Лезги газетдин” кьилин редактор Мегьамед Ибрагьимова лагьай фикирар чна газет кIелзавайбуруз теклифзава.

“Сифте нубатда заз и мярекат кьиле тухун патал пулунин куьмек гайи (80 агъзур­ манатдин кьадарда аваз) ФЛНКА-дин пре­зидент Ариф Пашаевич Керимоваз сагърай лугьуз кIанзава. Ада нубатдин се­ферда вичин рикI хайи халкьдихъ, багъри чIалахъ кузвайди къалурна.

Милли публицистикадай республикада ихьтин конкурс сад лагьай сеферда кьиле тухванва. Маса мил­летрихъ ихьтин тежриба авач, гьавиляй и рекье чун сад лагьайбур я. Малум тирвал, эхиримжи йи­сара Дагъустандин милли изданийрин редакцийриз кIвалахиз къвезвай жегьил пешекаррин кьадар садлагьана тIи­мил хьанва. И кардихъ са шумуд себеб ава. Конкурс тешкилунин макьсадрикай сад республикадин вузрин филологиядин факультетра кIелзавай студентрин арадай алакьунар авайбур хкягъун ва гележегда абурукай ашкъи авайбур кIвалахдалди таъминарун тир. Яни и мярекат тухвана ла­гьай тIвар хьун патал ваъ, тайин уму­дар­ни макь­садар аваз тешкилнавай. КIвен­кIвечи чкаяр кьур студентрикай гьар садахъ галаз чна кьилди кIвалах тухуда, абуруз хайи чIалал макъалаяр кхьин патал жуьреба-жуьре темаяр гуда, са гафуналди, абур редакциядиз мукьва ийида. И вад касдикай сада кьванни гележегда хайи редакцияда кIвалахдай къарар кьа­булай­тIа, им чун чи макьсаддив агакьна лагьай чIал я. И кардик чна еке умударни кутунва­. Ксай месик иситIа жа­гъидач лугьудайвал, пешекарар авач лугьуз, арза-ферзе, шел-хвал авунихъ са метлебни авач. Серенжемар кьабулна кIанда. И рекье чна сад лагьай кам къачунва лагьай­тIа, жеда…”.

Агьмед Магьмудов