Къурушвийрикай рахадайла, алай аямдин жегьил несилди Ватандин ЧIехи дяведа, Чечняда, Ботлихда международный террористрихъ галаз кьиле тухвай вакъиайра ватанэгьлийри къалурай кьегьалвилер, жуьрэтлувал рикIелай ракъурзавач. Абурун кьегьалвилер несилрилай несилралди, эстафета хьиз, давамарзава, абурал дамахзава. Алай вахтунда Донецкдин ва Луганскдин республикайра кьиле физвай военный махсус серенжемдани чпин хуьруьн тIвар мадни машгьурзава. РикIел хкин: ахьтин баркаллу рухвайрикай сад Чечнядин Ханкалада авай военный госпиталдин кьилин хирург Уружев Жалали Абусердерович 2009-йисан 16-мартдиз Рамзан Къадирован Указдалди Чечен Республикадин лайихлу духтур лагьай тIварцIиз лайихлу хьанай.
Къейд ийин хьи, военный махсус серенжем тухуз эгечIай гьа сифте йикъалай Дагъустандин къагьриман рухвайри чпин жуьрэтлувал, викIегьвал къалурзава. Са шумуд кас Россиядин Игит лагьай чIехи тIварцIиз лайихлу хьанва, вишералди чи игит рухвайрив “Жуьрэтлувиляй” ва маса орденар, гьукуматдин маса шабагьар вахканва. Абурун арада медицинадин подполковник Жалали Абусердеровични ава.
Ж. Уружев 1967-йисан 9-Майдиз Къурушрин хуьре рагьметлу Фатима бадединни Абусердер бубадин малдаррин хизанда дуьньядал атана. 8-класс гьана, юкьван мектебни 1984-йисуз ЦIийи Къурушдал акьалтIарна. Кьве йисуз Ватандин вилик пак буржи тамамарна хтай Жалали Дагъустандин мединститутдик экечIна. 5-курсунай Саратовдин военно-медицинский институтдиз фена. 1994-йисуз вуз куьтягьай Жалали Уружев Дальневосточный военный округдиз военный частунин медицинадин къуллугъдин начальниквиле рекье туна. Алакьунриз, пешедиз вафалу хьуниз килигна, частунин командованиди Жалали С.Кирован тIварунихъ галай военно-медицинский Академиядин “хирургия” пешедай ординатурадиз ракъурна. Анагни агалкьунралди куьтягьай Жалали Абусердерович Кеферпатан Кавказдин военный округдин Владикавказдин госпиталдиз хирургиядин отделенидин старший ординаторвиле рекье хтуна. Гьа йисара ада Чечняда террористрихъ галаз кьиле тухузвай серенжемрани иштиракна. Винидихъ къейднавайвал, 2006-йисуз Жалали Уружев Ханкалада авай военный госпиталдин кьилин хирург яз тайинарна, алай вахтундани гьана къуллугъзава.
Жалали Абусердеровича Ватандиз къуллугъда лагьана гайи ва гьакIни Гиппократан кьин садрани рикIелай алудзавач, гьамиша абуруз вафалу я. 2022-йисуз военный махсус серенжем башламишай йикъалай Жалали Абусердеровича ДНР-дин ва ЛНР-дин мулкарал медицинадин са батальонда кьилин хирург яз вичин везифаяр кьиле тухузва. ИкI, ругуд вацра подполковник Ж.Уружеван гуьзчивилик кваз хирургрин дестеди 2300-далай гзаф (абурукай саки кьве вишев агакьна лап заланбур) операцияр кьиле тухвана, вишералди аскерар къутармишна, кIвачел ахкьалдарна. И вахтунда вичин везифаяр лайихлудаказ кьилиз акъудай Ж. Уружев Донецк Республикадин Янисоватский ЦРБ-дин кьилин духтурдин патай “Жемятдин ва аскеррин уьмуьр къутармишунай”, “За медицинские заслуги” I дережадин ордендиз, “За воинскую доблесть” медалдиз, гьуьрметдин грамотайриз, чухсагъулдин чарариз ва маса шабагьриз лайихлу хьанва.
Медицинадин хирург-подполковник Ж.Уружеваз кьушунрин частунин штабдин начальник, полковник Р.Стефановичан, частунин медкъуллугъдин начальник Д.Волошкодин, частунин командир, медкъуллугъдин майор Р. Резрукован къулар алаз ганвай характеристикада ингье вуч кхьенватIа:
“Украинадин мулкарал военный махсус серенжем тухуз эгечIай гьа сифте йикъарилай, яни мартдилай августдал кьван, медицинадин къуллугъдин подполковник Уружев Жалали Абусердеровича, тежрибалу хирург яз, Кьиблепатан дестейрик кваз къуллугъна. Ада вичин вилик эцигнавай пешекарвилин мажбурнамаяр жуьрэтлудаказ, кьегьалвилелди кьилиз акъудна, гьеле Чечняда хьайи тежриба инани ишлемишна. Ада хирер алаз хканвай аскерар, медицинада адет хьанвайвал, дестейриз пайиз, яни сифте залан хирер хьанвайбур операция авунив эгечIна. Жалали Абусердеровичан тежрибалувили са шумуд кас кIвачер атIуникай хвена. Ада вичин тежриба санал къуллугъзавай жегьил хирургризни чирна.
Жуьрэтлувилиз, викIегьвилиз килигна, Луганскдин ва Донецкдин республикайра хирер хьанвайбур сагъар хъувунай ва къазанмишнавай агалкьунрай подполковник Жалали Абусердерович Пирогован ордендиз ва РФ-дин гьукуматдин шабагьриз лайихлу хьанва. Ада вичин везифаяр намуслудаказ, баркалладин таж кьилел алаз кьилиз акъудна”.
Дугъриданни, чи ватанэгьлиди вич пешедиз, къуллугъдиз вафалу кас тирди идалай виликни виринра субутарна. Адан крар, гьерекатар тIвар, къуллугъ паталди туш. Эхь, ам алай вахтунда вири Лезгистанда, Чечняда, Донецкда, Луганскда военный хирург яз чизва. Чна адал дамахзава.
Къуй, гьуьрметлу Жалали Абусердерович, ви тIвар мадни сейли хьурай! Къуй ви къуьнерал къизилдин гъетери нур гурай! Баркалла ваз, Къурушрин дамах Жалали Абусердерович!
Гьажи Къазиев,
РФ-дин журналистрин Союздин член
