Мефедрон жагъана
Дагъустандин МВД-дин УКОН-дин (Управление по контролю за оборотом наркотиков) къуллугъчийриз тади гьаларин серенжемар кьабулай вахтунда чкадин агьалидивай наркотикар жагъана.
МВД-дин пресс-къуллугъди малумарайвал, 27 йисан яшда авай жегьил ахтармишдайла, адав гваз хьайи порошок хьтин шей квай гъвечIи багъламаяр винел акъатна. Ахтармишунин нетижайри къалурайвал, адавай вахчурди мефедрондин юкьван кьадардин 62 доза тир. Наркотик санлай 12 граммдикай ибарат тир.
Полициядин отделдиз хкайда ихтилатайвал, наркотикар ада интернетдин алакъадин куьмекдалди маса къачуна.
И делилдай суд-силис авун патал материал кIватIнава. Силисдин кIвалах давам жезва.
Кьил акъудзава
Алатай жуьмядиз СтIал Сулейманан райондин полициядин дежурный частуниз Кьасумхуьрел 35 йисан яшда авай чкадин агьалиди 34 йисан яшда авай вичин папал чукIулдин хирер авурдакай ва гуьгъуьнлай гьа чукIулдалди вичелни рекьидалди хирер авур нагьакьан агьвалатдикай хабар агакьна. Арадал атай чIуру кардин нетижада пабни итим кьведни кьена. Идакай РД-дин МВД-дин телеграм-каналда хабар ганва. Агьвалат кьиле фейи чкадал силисчийрин дестеди кIвалахзава. Тайин малуматар гьелелиг раижнавач. И делилдай материал кIватIзава.
“Регьят къазанжидин” эхир
Дагъустандин МВД-дин УКОН-дин къуллугъчийри синтетикадин наркотикар маса гунин карда шак финай кьве итим кьунва. Идакайни чаз МВД-дин пресс-къуллугъди хабар гана.
Къейдзавайвал, ахтармишай вахтунда итимрив гваз хьайи юкьван 42 дозадин кьадарда авай мефедрон вахчуна. Шак финай кьунвайбуру ихтилатнавайвал, регьят пулар къазанмишунин фикир авай абурукай садаз интернетда наркотикар маса гузвай кас жагъана. Гуьгъуьнлай гзаф кьадарда санал маса къачуна ва муькуь итимди кура-кура маса гун патал наркотикар гьазуруниз ва улакьдин жигьетдайни куьмекар гана.
Полициядин къуллугъчийри тади гьалара кьабулай серенжемрин вахтунда Махачкъалада ва шегьердин къвалав гвай мулкуна шак физвайбуру маса гун патал гьазурнавай наркотикар авай чкаяр тайинарна. Аквазвайвал, “регьят къазанжидин” эхир хъсанди жезвач.
Тахсиркарвилин лишанриз килигна, РФ-дин УК-дин 228-статьядин 2-паюнай уголовный дело къарагъарнава.
«Лезги газет»
