Малум тирвал, алатай гьафтеда чи уьлкведин вири пипIера “Сад тир Россия” партиядин общественный приёмныйри агьалияр кьабулна. Анра сифте нубатда яшайишдин хилез талукь месэлайриз фикир гана. Чи республикада и хилен месэлайрай агьалияр Россиядин Яшайишдин Фондунин (СФР) Дагъустанда авай Отделенидин Управляющий Мегьамед Исаева ва адан заместитель Шарабудин Дарбишмегьамедова кьабулна.
Кьилди къачуртIа, чIехи пай агьалийри аялар галай хизанриз гьукуматди гузвай куьмекдин, сагъламвилин мумкинвилер сергьятламиш хьанвай ксарив агакьарун лазим тир алатрин (абурун сиягь гъвечIиди туш, гьа гьисабдай яз иник кресло-коляскаяр, костылар, махсус чарпаяр, памперсар ва маса затIар акатзава), пенсийрин гьакъиндай суалар гана.
М.Исаева къейд авурвал, ихьтин серенжемрин макьсад агьалийрин гьар са месэладай кьил акъудун, иллаки четин гьалда авай къатариз (иник лагьайтIа, тIимил къазанжияр авай хизанар, гзаф аялар авайбур, етим аялар, инвалидар, тамам тушир хизанар, аялар текдиз чIехи ийизвай дидеяр ва масабур акатзава) талукь хци месэлаяр гьялун, уьмуьрдин четин шартIара яшамиш жезвайбурув лазим куьмекар агакьарун я. Гьавиляй са месэлани гьял тавуна тадач.
Рагнеда Рамалданова
