Январдин вацран эхирра Дагъустан Республикадин Кьил Сергей Меликова гьукумдин органрихъ галаз йикъан, гьа гьисабдай яз, республика электроэнергиядалди, газдалди таъминарунин ери хкажунихъ ва агьалийрилай къвезвай арзайриз килигунин кIвалах хъсанарунихъ галаз алакъалу месэлайриз талукь гьар гьафтедин совещание тухвана.
Электросетрин майишат
“Россети Северный Кавказ” ПАО-дин генеральный директор Роман Левченкоди Дагъустандин агьалияр электроэнергиядалди таъминарунин кIвалахдин умудлувал хкажуникай, 2023-йисан январдин вацра арадал атай авариядин дуьшуьшрикай ва гьалар къайдадик кухтун патал кьабулай серенжемрикай малумат гана.
Аварийрикай рахадайла, ада баянар гайивал, Каспийскдин дуьм-дуьз механикадин заводдин подстанция къайдадикай хкатна. Алай вахтунда ам вахтуналди кардик кухтунва ва шегьердин агьалийриз кьве трансформаторди энергия гузва. Алай вахтунда абурал гуж акьалтзавач ва кIвалер, идараяр электроэнергиядикай хкудни ийидач. Р.Левченкоди къейд авурвал, подстанциядал мад са трансформатор хкизва, ахпа амни кардик кутада.
Махачкъаладин кIвалер, идараяр электроэнергиядикай хкудуниз талукь яз генеральный директорди малумарна хьи, “Махачкъала-110” подстанциядал цIийи трансформатор кардик кутунва. Виликанди къайдадикай хкатайвиляй меркездин хейлин районар экв авачиз амукьна. Пешекарри гьисабзавайвал, цIийи трансформаторди Махачкъаладин агьалияр электроэнергиядалди таъминарунин кIвалах хъсанарда. Хъийизвай кIвалахрикай рахадайла, Р.Левченкоди лагьана хьи, “Махачкъала-110” подстанциядал куьгьне кьве трансформатор цIийи ва гужлубуралди дегишарда.
Агьалияр электроэнергиядалди таъминарзавай подстанцийрин кIвалах гуьзчивилик ква, и кардал пешекаррин махсус бригадаяр машгъул я. Абуру мекьи гьаваяр амай кьван вири республикада кIвалахда.
Идахъ галаз сад хьиз, генеральный директорди къейдна хьи, республикадин электросетрин комплексдин кIвалахдин умудлувал хкажун патал махсус программа уьмуьрдиз кечирмишун давамарда.
— ЦIинин йисузни фикирдиз къачунвай крар кьилиз акъудун патал бес кьадарда такьатар чара ийизва. Алай йисан кьвед лагьай кварталдилай гуьгъуьниз чун махсус программа кьилиз акъудунив эгечIда ва сифте нубатда региондин электроэнергия арадал гъизвай центрайра дегишвилер твада. Инанмиш я, чалай гъиле кьазвай вири крар вахтунда тамамариз алакьда, — лагьана Р.Левченкоди.
Газдин комплекс
“Газпром межрегионгаз Махачкала” ООО-дин генеральный директор Ленар Мансурова газдихъ галаз алакъалу къурулушда арадал атай татугайвилерин себебрикай ва абур арадай акъудуникай, талукь ксар жавабдарвилиз чIугуникай малумат гана.
Гьа гьисабдай яз, линияда газдин давление виниз акъатуникди меркездин Лаптиеван куьчеда яшайишдин кIвалери цIаяр кьуникайни ихтилат кватна. Идакди гзаф квартирайрин 40 ва хсуси 50 кIвал (6500 агьали) газ авачиз амукьна. Къенин юкъуз гуьнгуьнай акъатнавай газорегуляторный пункт дегишарнава ва кIвалериз газ ахъай хъувунва. ЦIай кьунвай кIвалера ремонтдин кIвалахар кьиле физва.
Уьмуьрдин хатасузвилин истемишунриз жаваб тагузвай жуьредин къуллугъар авунай ва муьштерийрин сагъламвилиз хасаратвал гунай уголовный дело къарагъарнава. Малум хьанвайвал, ихьтин татугай дуьшуьш газорегуляторный пункт гуьнгуьнай акъатунихъ галаз алакъалу хьана. Нетижада сетра газдин давление лап виниз акъатна.
Ленар Мансурован гафаралди, алай вахтунда газораспределительный вири пунктар ахтармишзава. Арадал атанвай гьаларин себебар чирун патал къенепатан ахтармишунар кьиле тухузва. ЦIай кьуникди зиян хьанвайбуруз эвездин пулар хгуда.
Региондин Кьили гьукумдин органрал ихьтин вахтара агьалийрин итижар хуьн тапшурмишна. ГьакIни Сергей Меликова агьалияр газдалди таъминарзавай компаниядин регьбердивай агьалийриз ийизвай къуллугърин ери хкажунал датIана гуьзчивал авун истемишна.
РД-дин Кьилин ва Гьукуматдин Администрациядин регьбердин заместитель, РД-дин Кьилин информациядин сиясатдин управленидин ва пресс-къуллугъдин начальник Рашид Акавова Сергей Меликова тухвай ачух эфирдиз агьалийрилай атай арзайрин ва зенгерин гьакъиндай малумат гана. Региондин Кьилин тIварунихъ 4,5 агъзур суал атана. Агьалийрик секинсузвал кутазвай месэлаяр энергетикадихъ, гьаятар, мулкар аваданламишунихъ, рекьерин еридихъ, образованидихъ ва здравоохраненидихъ галаз алакъалубур тир.
Са бязи тапшуругъар алатай гьафтеда кьилиз акъудунив гатIуннава. Бязи маса месэлаярни гьялзава. Сергей Меликова и кардал кьетIен гуьзчивал авун тапшурмишна.
Совещанидал республикада рекъемрин трансформациядин месэла гьялзавай гьалдизни килигна. Идан гьакъиндай малумат министр Юрий Гьамзатова гана.
Ведомстводин регьбердин гафаралди, республикада “Устранение цифрового неравенства” программадин сергьятра аваз яргъал хуьрерни мобильный алакъадалди таъминарунин кIвалахар давам жезва.
Хийир Эмиров
