Дагъустанда гриппдик инсанар кьейи кьуд дуьшуьш винел акъуднава. Идакай 25-январдиз РД-дин Гьукуматдин Махачкъалада кьиле фейи заседанидал премьер-министр Абдулмуслим Абдулмуслимова хабар гана.
Малум тирвал, уьлкведин вири регионрин агьалийрин арада жуьреба-жуьре азарриз акси тир вакцинация кьиле тухузва. Эхиримжи йисарин рекъемри шагьидвалзавайвал, Дагъустанда вакцинациядикай кьил къакъудзавайбурун кьадар къвердавай гзаф жезва. Мисал яз, эгер 2015-йисуз дифтериядиз акси яз республикада рапар ягъ тавур аялрин кьадар 4 агъзур тиртIа, алатай йисуз и рекъем саки 24 агъзурдав агакьна.
РД-дин Гьукуматдин Председателди къейд авурвал, гриппдик кьейибурукай садани вакцинация авунвачир. И делилди нубатдин сеферда азарриз акси рапар ягъунихъ еке метлеб авайди тестикьарзава.
Республикада вакцинациядиз талукь яз авай гьаларикай гегьеншдиз вичин рахунра РД-дин здравоохраненидин министр Татьяна Беляевади ихтилат авуна. Ада къейд авурвал, вакцинация сагъламвилин замин я.
Заседанидин кIвалахдикай “Лезги газетдин” сайтдай кIелиз жеда.
Агьмед Магьмудов
