Акбер Садиров 1985-йисуз Усугъчай хуьре дидедиз хьана. 2002-йисуз гимишдин медалдалди мектеб куьтягьай ам Махачкъалада ДГУ-дин юридический факультетдик экечIна. 2005-2013-йисара Докъузпара райондин суддин приставрин отделда кIвалахна. И къуллугъдал адахъ агалкьунарни хьана. 2012-йисуз ам Россиядин ФССП-дин директор А.Парфенчикова “Суддин лап хъсан пристав” наградадалди къейдна. ФССП-дин къурулушди тухвай лишанар ягъунин, чукурунин акъажунрани ада гъалибвилер къазанмишна. 2013-2014-йисара Акбер Садирова Докъузпара райондин паспортдин столдин начальник яз, 2017-йисан са гъвечIи вахтунда УСЗН-дин пешекар яз кIвалахна. Къуллугъдин рекьяй са шумуд идарада вичин алакьунар къалурай жегьил пешекарди 2017-йисан сентябрдилай винидихъ къейднавай пожарный частуна кIвалахзава.
И йикъара зун Докъузпара районда авай 37-нумрадин пожарный частунин начальникдин заместитель Акбер Садирович САДИРОВАХЪ галаз гуьруьшмиш хьана.
- Акбер Садирович, райондин сергьятра цlаяр кьунин дуьшуьшар гзаф жезвани?
— Шадвилелди жаваб гуз жеда, чина цlаяр кьунар лап тlимил жезва. Кьилди цlинин йисал акъвазайтlа, райондин сергьятра алай йисан алатнавай варцара цlай кьур вад дуьшуьш арадал атана. Гарагърин ва Мискискарин хуьрера гьар сана са кlвал, Усугъчайдал электрикдин шалман ва мадни эцигунрин материалрикай амукьай зирзибилри 2 сеферда цlай кьуна. Чи къуллугъчийрин дестеди лазим жуьреда серенжемар кьабулна. Кьилинди, инсанрин сагъламвилиз зарар хьайи дуьшуьшар авач.
- Куь къурулушдикай инсанриз мад гьихьтин куьмекар жезва?
— Асул везифаяр цlаяр хкадарунихъ галаз алакъалу я. Лугьуз жеда, чун автомобилрин хасаратвилер хьайи чкайрални физва. Сечкияр кьиле фидай вахтунда сечкийрин участокрални гуьзчивал тухузва, анра цlаяр кьунин дуьшуьшар тахьун патал хатасузвал таъминарзава.
- Зи рикlел аламайвал, алатай йисара тапан зенгер къвез, куь къурулуш инжиклу ийизвай дуьшуьшар жезвай. И месэла алай вахтунда гьикl гьялнава?
— Исятда ихьтин “къугъунар” хъийизмач. Агьалияр гъавурда гьатнава. Чна къвезвай малумат ахтармишзава.
- Цlаяр кьунин дуьшуьшар тахьун патал куьне хуьрера, общественный идарайра халкь гъавурдик кутунин жигьетдай гьихьтин кlвалахар тухузва?
— Цlаяр кьунин вилик пад атlунин чараяр акунин серенжемар тухун патал гьар йисуз тайин план туькlуьрзава. Пландин бинедаллаз мектебра, аялрин бахчайра, маса тешкилатра, хуьрерин администрацийрихъ галаз санал, гьакI жемятдин иштираквални аваз гуьруьшар кьиле тухузва.
- Алай вахтунда арадал къвезвай цlаяр кьунин асул себебар гьибур я?
— Цlухъ галаз алакъалу тир чIуру нетижайрал гъизвай дуьшуьшар инсанар себеб яз жезва. Токдив, пичерив, гурмагърив лазим къайдада эгечlзавач. И крариз фикир тагунин нетижада эменни барбатl хьунин, инсандин сагъламвал патал хаталувилин дуьшуьшар арадал къвезва. Ибур агьалийри мукъаятвал тавурла жезвай чlуру крар я.
- Везифаяр талукь тирвал кьилиз акъудун патал квехъ вири жуьредин мумкинвилер авани?
— Эхь, мумкинвилер ава. Пешекар къуллугъчийрин, герек тир техникадин жигьетдай гьич са четин месэлани авач. Улакьра гьамиша яд ава, амма цин гьамбарханаяр вири хуьрера гьелелиг авач.
- Акбер Садирович, эхирдай къуллугъчийрин дестедикайни куьрелди ихтилатнайтIа кIанзавай…
— Пожарный частуна 19 касди дуствилелди къуллугъзава. Гьар нубат атайла, кьуд-кьуд къуллугъчиди кlвалахзава. Санлай къачурла, вири къуллугъчийри чпин везифаяр лазим тирвал кьилиз акъудзава.
Куругъли Ферзалиев
