Росгвардиядин РД-да авай Управлениди “Росгвардиядихъ галаз мурад кьилиз акъуда” серенжемдин сергьятра аваз и йикъара хейлин аялриз ихьтин мумкинвал гана.
Дидени буба кьилел аламачиз, етим аялрин школа-интернатда чирвилер къачузвай 13 йиса авай Рамазанахъ военный лётчик хьунин мурад ава. Мадни адаз лётчикдин кабинада аваз лув гуз кIанзавайди чир хьайила, Росгвардиядин авиациядин махсус дестедин лётчикри аялдиз ихьтин мумкинвал гана. ИкI, абуру Рамазаназ чпин базадиз эверна ва ам Ми-8 вертолётдин штурвалдихъ ацукьарна. Ведомстводин векилри жавандиз лувар квай машин гьикI туькIуьр хьанватIа ва гележегда пешекар пилот хьун патал вуч авун лазим ятIа, суьгьбетна. Жавандиз аэродромдал экскурсияни тешкилна, жуьреба-жуьре авиатехника къалурна ва пишкешни гана.
Рамазана и югъ вичин рикIел яргъалди аламукьдайди къейдна.
* * *
Росгвардиядин РД-да авай Управленидин Махачкъаладин ОМОН-дин къуллугъчийри телеф хьайи чпин женгинин юлдаш, полициядин прапорщик Тельман Гьажибегован хизандал кьил чIугуна ва адан хва Исламан мурад кьилиз акъудна.
Исламаз къанун-къайда хуьдайбурун машинда аваз финин мурад авай. Росгвардиядин къуллугъчийри и кар кьилиз акъудна, адаз ва вахаз пишкешарни гана. Ислама гележегда вичихъ къанун-къайда хуьдайбурун жергеяр къалинардай ва бубадин кар давамардай къаст авайди къейдна.
Рагнеда Рамалданова
