Ахцегьай тир машгьур шикилчи Юсиф Саркарова
республикадин дережада кьиле фейи конкурсда 3-чка кьуна.
И мукьвара Махачкъалада РД-дин туризмдин ва халкьдин яратмишунрин сеняткарвилерин министерстводи тешкилнавай “Тийижир Дагъустан” лишандик кваз шикилрин конкурс кьиле фена. Ана уьлкведин саки вири регионрай агъзурдалай виниз пешекар ва гьевескар шикилчийри иштиракна.
Конкурсдин нетижаяр кьуниз талукьарнавай мярекатдал республикадин туризмдин ва халкьдин яратмишунрин сеняткарвилерин министрдин заместитель Мегьамед Гьабибуллаева къейд авурвал, серенжемдин иштиракчийрин арада уьлкведин жуьреба-жуьре регионра яшамиш жезвай, виликдай Дагъустандиз мугьман хьайи гзаф кьадар туристарни авай. Конкурсдиз рекье тунвай гьар са шикил тамам са эсер хьиз тир. Гьавиляй жюридиз абурун арадай лап хъсанбур хкягъун четин акъвазна.
Шикилрин конкурс пуд номинациядикай ибарат тир: “Виридалайни хъсан шикил”, “Лап хъсан видео”, “Тийижир Дагъустан”. Гьар са номинациядай гъалибчидиз, кьилин приз-пишкеш яз, 250 агъзур манатдин сертификат гана.
Къейд ийин хьи, “Виридалайни хъсан шикил” номинациядай Ахцегьай тир машгьур шикилчи ва гьевескар эколог Юсиф Саркарован “Ахцегьа кьуьд” шикил 3-чкадиз ва адан автор дипломдизни пулунин пишкешдиз лайихлу хьана. 1, 2-чкаяр “РикIин эверун” шикилдай — Расул Рашидоваз ва “Йисан вахтар” шикилдай Дмитрий Ронжиназ гана.
Лагьана кIанда, ихьтин дережадин конкурсда сифте яз иштиракуналди, 3-чка кьун Юсиф Саркароваз чна рикIин сидкьидай мубаракзава. Адахъ мадни еке агалкьунар хьурай!
Дашдемир Шерифалиев
