ЦIийи йисан вилик Дагъустандин Кьил Сергей Меликова 2022-йисуз яшайишдин жуьреба-жуьре хилера тафаватлу хьайи са жерге дагъустанвийрив государстводин шабагьар вахкана. Абурун арада чи ватанэгьлиярни ава.
Шайдабег Мирзоев — ДГПУ-дин профессор, Тахо-Годидин тIварунихъ галай илимдинни ахтармишунрин институтдин педагогикадин сектордин заведующий, Алкьвадар Гьасанан тIварунихъ галай медениятдинни марифатдин центрадин директордин заместитель. Ам 2022-йисуз Дагъустандин Кьилин грантар патал малумарай конкурсда гъалиб хьана.
Мадни и конкурсдин гъалибчийрин арада ДГПУ-дин проректор Руслан Гереев, тарихдин “Урусат — зи тарих” паркунин регьбер Тимур Велиханов ава.
Эльмира Къараханова — СтIал Сулейманан тIварунихъ галай госмуздрамтеатрдин актриса. Адаз “Дагъустан Республикадин лайихлу артист” тIвар ганва.
Эмин Мерданов — РД-дин туризмдин ва халкьдин художественный сеняткарвилерин министр. Ам Дагъустандин Кьилин Разивилин чарчиз лайихлу хьана.
Назират Азимова — СтIал Сулейманан райондин ЦIийихуьруьн юкьван мектебдин муаллим. Адаз “Дагъустан Республикадин лайихлу муаллим” тIвар ганва.
“Лезги газетдин” редакциядин коллективди абуруз ва алатай йисуз гьуьрметдин тIвараризни государстводин шабагьриз лайихлу хьайи вири ватанэгьлийриз агалкьунар ва ЦIийи йис мубаракзава. Къуй алукьнавай йисуз мадни чIехи гъалибвилер хьурай!
«Лезги газет»
