29-декабрдиз РД-дин Гьукуматдин Председатель Абдулмуслим Абдулмуслимова “Лезгинка” ансамблдин коллективдихъ галаз гуьруьш кьиле тухвана ва тафаватлу хьайи артистрив Дагъустандин Гьукуматдин гьуьрметдин грамотаяр вахкана.
Гуьруьшдал республикадин премьер-министрди ансамблди Дагъларин уьлкведин меденият вилик тухуник кутазвай чIехи пай ва ада Кавказдин вири халкьарин медениятдин девлетлу ирс дуьньядиз машгьурзавайди къейдна. Ада гьакIни 2020-йисуз милли проектдин сергьятра аваз эцигиз гатIуннавай “Лезгинка” тIвар алай кьуьлерин кIвал мукьвара ишлемишиз вахкудайдакай хабар гана.
Ансамблдин директор Жамбулат Мегьамедова, 2023-йисуз кьиле тухудай кIвалахрикай рахадайла, Расул Гьамзатован юбилейдин сергьятра аваз ансамблди республикадин гзаф районрани шегьерра чIехи концертар гудайдакай лагьана.
Гуьруьшдин эхирдай А.Абдулмуслимова халкьарин милли адетар машгьуруник ва халкьарин арада медениятдин рекьяй алакъаяр мягькемаруник лайихлу пай кутунай ансамблдин 6 артистдив гьуьрметдин грамотаяр вахкана.
Чи мухбир
