29-декабрдиз Дагъустан Республикадин Кьил Сергей Меликова тафаватлу хьайи дагъустанвийрив государстводин 50-далай виниз шабагьар вахкана. И кардиз талукьарнавай шад мярекат меркездин Дуствилин кIвале кьиле фена. Шабагьриз лайихлу хьайи ксарин арада военный махсус серенжемдин иштиракчияр, муаллимар, духтурар, культурадин деятелар, промышленностдин карханайрин ва государстводин къуллугъчияр авай.
Мярекат ачухай Сергей Меликова кIватI хьанвайбуруз ЦIийи йис тебрикна ва алатзавай йисан бязи нетижайрикай ихтилатна.
Региондин Кьили иллаки Ватан хуьзвай баркаллу рухвайрин крар къейдна. “Къе чна викIегь, зегьметдал рикI алай, къастуналди вилик физвай халис пешекарар тир дагъустанвияр къейдзава. Абуру, акьалтзавай четинвилеризни килиг тавуна, вахтунин имтигьанриз уьтквемвилелди жаваб гуналди, республика ва уьлкве вилик финик еке пай кутазва. Россиядин маса аскеррихъ, гуьгьуьллубурухъ галаз сад хьиз чи кьегьалрини игитвилин, жуьрэтлувилин, Ватан кIан хьунин жигьетдай Украинада кьиле тухузвай военный махсус серенжемда чешне къалурзава”, — лагьана С.Меликова.
Абуруз сифтебурун жергедаваз государстводин шабагьар гана. “Жегьилриз ватанпересвилин тербия гуник пай кутунай” Амет-Хан Султанан тIварунихъ галай медаль — 6 аскердиз, 3 касдиз РД-дин Кьилин тIварунихъай рикIел аламукьдай сятер гана.
“Са рахунни алач, чи аскерри государстводин умуми месэлаяр гьялун патал чпин вилик эцигнавай везифаяр муракаб гьалара тамамарзава. Ихьтин четин ва хаталу кар кьилиз акъуддайла, абур гьар са декьикьада хаталувилик акатзава. Са куьнизни килиг тавуна, женг чIугвазвай чи гадаяр игитар я. Заз абуруз виридаз сагърай лугьуз кIанзава. Чи патай абурув чими саламар агакьара ва сагъдаказ, гъалибвал гваз кIвализ хтурай! Уьлкведин Президентди лугьузвайвал, “Чун гьахълу я, гьахъвиле къуват ава, гьавиляй гъалибвални чиди жеда!”, — лагьана Сергей Меликова, аскеррив шабагьар вахкудайла.
Государстводин шабагьриз акьалтзавай несилдиз чирвилер ва тербия гузвай образованидин пешекарарни лайихлу хьана.
Сергей Меликова чпин кIвалах пешекарвилин дережада аваз кьиле тухузвай медицинадин работникрин кIвалах кьилди къейдна. Шабагьар агакьайбурун арада республикадин А.Вишневскийдин тIварунихъ галай клиникадин больницадин отделенидин заведующий Арсен Шабанов (“РФ-дин лайихлу духтур” лагьай тIвар), республикадин клиникадин 2-нумрадин больницадин духтур рентгенолог Сабигат Эльдарова (“РД-дин лайихлу духтур”).
Культурадин хиле зегьмет чIугвазвайбурни фикир тагана амукьнач. Дагъустандин кьуьлердай “Лезгинка” ансамблдин художественный руководитель Зулумхан Хангереевав — “Ватандин вилик лайихлувилерай” II дережадин медаль-орден, манийрин ва кьуьлерин “Дагъустан” ансамблдин директор Дабай Дабаевав РФ-дин культурадин лайихлу работник лагьай диплом вахкана.
РД-дин кьилин шабагьдиз — “Дагъустан Республикадин вилик лайихлувилерай” ордендиз — Даггосмедуниверситетдин доцент Жамалудин Абдулфатагьов, Россиядин писателрин Союздин членар — Расул Багомедов ва Залму Батырова лайихлу хьана.
Дагъустан Республикадин гьуьрметдин грамотаяр Сергей Меликова КЭМЗ концерндин 3 — разряддин токарь Тофик Гьаруноваз, государстводин регистрациядин, кадастрдин ва картографиядин федеральный къуллугъдин управленидин Дербентдин муниципальный отделдин начальникдин заместитель Мурад Гьасановаз, ракьунни бетондин шейэр акъуддай “Стройдеталь” заводдин мастер Имамедин Гьуьсейноваз гана.
“Куьн гьакъисагъвилелди зегьмет чIугуналди, пешекарвилин устадвилелди сад-садаз мукьва я. Виридалайни кьилинди, куьне куь зегьмет, бажарагъ ва чирвал чи инсанрин абадвал патал серфзава”, — къейдна Сергей Меликова.
Региондин Кьили лагьайвал, уьлкведиз малумарай къадагъайриз ва маса жуьредин четинвилеризни килиг тавуна, республика виликди физва. Вири и хъсан дегишвилерин себебкарар гьар са чкада дурумлувилелди чпин крар тамамарзавай зегьметчи инсанар я.
Сергей Меликова гьакI РД-дин Кьилин грантриз лайихлу хьайи конкурсдин гъалибчийривни дипломар вахкана. Абурун арада образованидин, илимдин, техникадин, инновацийрин, экономикадин, культурадин, искусстводин, гъвечIи бизнесдин, жегьилрин сиясатдин, СМИ-рин ва жемиятдин кIвалахдин жигьетдай проектар кхьенвай векилар ава.
“Дагъустан Республикадин Кьилин грантрин конкурс кьиле тухуз 15 йис жезва. Гьар йисуз адак талукь дегишвилер акат хъийизва. Гьа са вахтунда номинантрин кьадарни гзаф жезва. Жегьилри фикир желбдай, гележегда менфят хкатдай проектар теклифзава. И конкурсди бажарагълубуруз чпикай хабар гудай ва республикани уьлкве патал хъсан крар ийидай мумкинвал яратмишзава”, — лагьана Сергей Меликова.
Хийир Эмиров
