Рагьметлу шаир, муаллим Абдул МутIа­либова “КIварчагъ дере”  шиир дуьшуьшдай кхьейди тушир. И кардихъ себебар гзаф авай. Кьи­линди, адан фикирда инин тIебиатдин гуьр­чегвал, и кьил а кьил авачир хьтин бул бе­­гьеррин уьзуьмлухрин багълар, кьве гъил къа­къажна, гъвечIиди-чIехиди талгьуз, галатун фикирда тахьай зегьметчи инсанар, кьуд стха хьиз, са фикирдаллаз яшамиш жезвай кьуд хуьруьн жемятар хьана. Мадни дава­ма­райтIа, чпин хсуси адетар, мел-мехъеррин межлисар кьиле тухун, чIехи-гъвечIи чир хьун, арада гьуьрмет-хатур хуьн, маса адетрални кIевелай амал авунни чешне къачуниз лайихлу кар я.

Къенин юкъузни и жемятрин, дередин адетар куьгьне хьанвач, абурал вирида  амалзава, аялриз гьеле кьепIи­намаз чирзава. И гафар­ тестикьарун патал заз  са мисал гъиз кIан­за­ва. Базардин югъ квачиз, амай вири йи­къа­рин пакамахъ  КIвар­чагъ дередай Кьа­сум­хуьрел хъипи рангунин еке автобус къвез­­ва. Нисинин сятдин  12-даз ам райцентрадай элкъвена дередиз хъфизва. И рекье автобусди гьерекатиз цIуд йисалай гзаф вахт я. Шофер Мегьамед хъуьтуьл къилихрин, къени кас я. Гъил хкажна, ишара авур са касни ада рекьел тадач­. Имни пулуна вил тунвайвиляй  ваъ, вич гьар са касдин чкадал эцигзавайвиляй, масадан гъавурда гьатзавайвиляй я. Вичихъ галаз дередай атай ксар вири  кIватI хъжедалди  ада автобус чкадилай юзурдач, сад амай кьван гуьзлемишда. Инсанризни и кар чизва, вахтун­да чкадал кIватI хъжезва.

КIварчагъ дередай  тIвар-ван авай  алимар, спортсменар, зегьметчи инсанар тIимил акъатнач. Абуру чпин краралди инсанриз хъсан гел тунва.

Къе заз вичикай суьгьбет ийиз кIанзавай  Абдулмежидов  Эминни  баркаллу крарал машгъул дередин векил, хци кьатIунар, зигьин­ авай, акьуллу кас я. КIварчагъ дередин хуьрера  адаз вирида гьуьрметзава. Эминакай хуш келимаяр заз фадлай ван хьайиди тир.  “Куьредин ярар” фестивалда чаз мукьу­вай таниш жедай мумкинвал хьана. Эмина  Вла­ди­­мир шегьерда политехнический университетдин инженервилин факультет агалкьунралди акьалтIарна, радиоинженервилин пешекарвал къачуна. Адаз радиоэлектронный технологияр хъсандиз чида. Хуь­руьнбу­руз ада телевизорар ва маса техника чкадал ремонт авуналди куьмекар гузва. И кIва­лахни ада вичин кIвале кьилиз акъудзава. Вичин мастерскойда ада гьакIни кIарасдикай вижевай затIар гьазурзава: гуьрчег куьсрияр, гьар жуьредин рамкаяр, шахматар ва маса за­тIар. Вич­ин гъилелди гьазурнавай хейлин шей­эр­  Эмина хуьруьн мектебдиз, библиотекадиз, кьилдин ксаризни ба­гъиш­на. Вичин сенятдал Эмина 6-классда кIел­завай хтул Имамни желбзава. Абуру санал­ устIарвал, ремонтрин кIва­лахар ийизва, чирви­лер агакьарзава. Кьилинди, ада Имамаз мергьяматлу, баркаллу крар авунин важиблувал вичин чешне­далди къалурзава. И йикъара абуру мектебдин класс патал, гуьрчег ракIар гьазурна, ку­ту­на.

Кьасумхуьрел кьиле фейи “Куьредин ярар” фестивалдиз  чIехи бубадини хтулди  чпи гьазурнавай гъилин затIар гъанвай. Инсанри абуруз  еке итиж ийизвай. Заказар гузвайбурни авачиз тушир.

Гележегда Эминаз гьазурзавай  затIарин жуьреяр мадни гзафардай фикир ава.

Райсудин  Набиев, зегьметдин ветеран