ЕГРН-дай (Единый государственный реестр не­дви­жимости) гузвай документди хсусиятдин сагьибвал тес­тикьарзава. ГьакIни ада юзан тийидай объектдикай малу­матар жезва. Выписка ихьтин дуьшуьшра чарасуз я:

— ирсиниз талукь документ туькIуьрдайла;

— объект багъишуниз талукь документ туь­кIуьрдайла;

— квартира приватизация ийидайла;

— квартира ва я маса объект гиравда эцигна, банкунай кредит къачудайла;

— яшайишдин шартIар хъсанарунин макьсаддалди учетда акъваздайла.

Тикрарна хгузвай шагьадатнама

Эвленмиш хьунин гьакъиндай шагьадатнама кьвед лагьай сеферда яз ихьтин дуьшуьшра вахчуз жеда:

— квахьайла;

— чIур хьайила;

— документ ишлемишдай мумкинвал ама­чирла, гьа жергедай яз шагьадатнамадин бланк куьгьне­ жуьрединди тирла;

— кхьинар ва я ЗАГС-дин муьгьуьр кIе­лиз техжезвай гьалда авайла;

— ламинироватнавайла.

И къуллугъ герекзавайбурувай МФЦ-диз фейитIа же­да. Жував паспорт гваз хьун ва 350 манатдин кьадарда госпошлина гун (МФЦ-дин терминалдай) лазим я.

Эменни тIимил авай хизандиз талукь справка

Регионда тайинарнавай яшамиш хьунин агъа кIанин кьадардин такьатрилай гьар са нефесдал тIимил къазанжи гьалтзавай хизан эменни тIимил авайди яз гьисабзава.

Эменни тIимил авай хизандиз талукь дережа къачун патал агьалийривай МФЦ-дикай менфят къачуз жеда. Идарадиз ихьтин документар гваз фена кIанда: диде-бубайрин паспортар, вири аялрин хайивилин гьа­къиндай шагьадатнамаяр, эхиримжи пуд вацран къазанжидин гьакъиндай справка.

Тамам малуматар МФЦ-дин идарадин пешекарривай хабар кьаз жеда.

«Лезги газет»