Играми ватанэгьлияр! Гьуьрметлу мусурманар!
Чна квез рикIин сидкьидай Сив хуьнин сувар мубаракзава!
Абу Хурайради агакьарайвал, Пайгъамбарди (с.а.с.) лагьаналда: «Ни Рамазандин вацра рикIин сидкьидай иман гваз ва Аллагьди патай сувабар агакьуник умуд кваз сив хвенатIа, адан виликан вири гунагьрилай гъил къачуда» (Аль-Бухари ва Муслим).
И гьадисдай аквазвайвал, Рамазандин вацрахъ мусурманар патал еке важиблувал ава. Пак варз себеб яз инсанар руьгьдин жигьетдай михьи жезва, абурун рикIериз Аллагьди мергьяматлувилин, берекатрин тум чукIурзава…
Къуй чна и вацра хвенвай сивер, кьунвай садакьаяр, авунвай дуьаяр Сад Аллагьди кьабулрай! Къуй чаз Халикьди жуьреба-жуьре «уьзуьрри» кьил хкажзавай и мугьман дуьньядал дуьз рекьелай алат тавуна, гьарамни гунагь квачир уьмуьр кьиле тухудай мумкинвал гурай! Къуй дуьньядал ислягьвили агъавалрай, гьуьжетра авай пачагьарни баришугъ хъхьурай! Чи гьар садан кIвале гьуьрметни хатур, берекатни нур хьурай!
Чаз квехъ виридахъ чандин сагъвал, рикIин динжвал, хизанрин хушбахтвал, къени крара ва ниятра еке агалкьунар хьана кIанзава. Къуй куьн вири Аллагьди хуьрай! Амин!
«Лезги газетдин» редакциядин коллектив
