Украинада кьиле физвай махсус серенжемда телеф хьайи, Дербентдин 9-нумрадин юкьван школада кIелай Рашид Мирзоеван тIвар эбеди авуниз талукьарна, 24-декабрдиз мемориалдин кьул ачухзавай мярекат кьиле фена. Ана Дербент шегьердин кьилин заместитель Видади Зейналова, шегьердин депутатрин собранидин председатель Гьасан Мирзоева, ветеранрин советдин председателдин заместитель Эшреф Хидирова, военный комиссардин заместитель Ахрасиб Алиева, школайрин муаллимри, аялри, телеф хьанвай игитдин багърийрини мукьва-кьилийри иштиракна.
Вичин рахунра Видади Зейналова ватанпересвилин мярекатдин важиблувал къейдна. Ада аскервилин буржи уьтквемвилелди тамамарай гьар са кьегьал россиявийри рикIелай ракъур тийидайдахъ игитдин багърияр инанмишарна.
Анал кIватI хьанвай аялрихъ элкъвена рахай Рашид Мирзоеван классдин руководитель хьайи Эльмира Мегьамедовади къейдна: “Игит рикIел хуьх, адан кьегьалвилел, тIварцIел дамах ая, куьне Рашид Мирзоева кIелай школада чирвилер къачузвайди рикIелай ракъурмир”.
Игитдин бубади кIватI хьанвайбуруз сагърай лагьана ва военный махсус серенжемда телеф хьайибурун диде-бубайриз сабурлу хьун теклифна.
Мярекат мемориалдин кьулунал цуькверин кIунчар эцигуналди ва са декьикьада кисна акъвазуналди акьалтIна.
Къагьриман Ибрагьимов
