Дагъустанни Ингушетия яшайишдин
жуьреба-жуьре хилерай санал кIвалахиз гьазур я
26-декабрдиз Дагъустандин Кьил Сергей Меликова Ингушетиядин Кьил Магьмуд-Али Калиматовахъ галаз гуьруьш кьиле тухвана. “Лезги газетдиз” РД-дин Кьилин пресс-къуллугъди хабар гайивал, регионрин регьберри промышленностдин ва хуьруьн майишатдин хилера амадагвилин алакъаяр мягькемаруниз талукь месэлаяр веревирдна.
Кьилди къачуртIа, абур республикайриз лифтер гьазурунин карда герек къведай алатар чара авуникай, цIийи производствояр кардик кутун патал пешекарар рекье туникай рахана.
“Алай вахтунда Ингушетияда кIвачин къапар акъуддай производство хъсандиз вилик физва. Идалайни гъейри, дяведин рекьяй къуллугъзавайбур патал махсус парталар цвадай карханаяр, аялриз недай-хъвадай суьрсет гьазурзавай комбинат вилик тухуниз кьетIен фикир гузва. Чахъ регионда промышленностдин карханайра цIийи шартIара кIвалах кардик кутадай ниятар ава ва и жигьетдай чаз Дагъустандихъ галаз авай амадагвилин алакъаяр мягькемариз кIанзава”, — лагьана М.-А.Калиматова.
Сергей Меликова къейд авурвал, Дагъустан Ингушетиядихъ галаз яшайишдин вири рекьерай санал кIвалахиз гьазур я.
Гуьруьшдикай гегьеншдиз Дагъустандин Кьилин сайтдай кIелиз жеда.
«Лезги газет»
