17-декабрдиз Мегьарамдхуьруьн М.Гьажиеван тIварунихъ галай 1-нумрадин мектебда мини-футбол къугъвадай цIийи майдан ачухуниз талукьарнавай мярекат кьиле фена. Ана иштиракайбурун арада РД-дин Халкьдин Собранидин депутат Мусафенди Велимурадов, Мегьарамдхуьруьн райондин кьил Фарид Агьмедовни авай.
“Спортдин цIийи майданди жегьилриз сагъламвал мягькемардай, чпин азад вахт менфятлудаказ акъуддай мумкинвал гуда. Идалайни гъейри, ихьтин майданар кардик акатуни футбол вилик финизни таъсирзава. Чи район патал и кар иллаки важиблу я, гьикI лагьайтIа, муниципалитетдин хуьрера футболдал машгъул жезвайбурун кьадар гзаф я. Мегьарамдхуьруьн райондин футболдин “Леки” командадикайни са шумуд йисуз республикадин чемпионатдин гъалибчи хьана. И делилри чахъ авай мумкинвилер къалурзава. Гьавиляй районда футбол вилик тухуниз кьетIен фикир гун давамни жеда”, — къейдна Фарид Агьмедова цIийи майдан ачухуниз талукьарнавай мярекатдал. Гуьгъуьнлай ада мектебда кIелзавай аялриз, хуьруьн агьалийриз и вакъиа мубаракна ва жегьилриз спортдал машгъул хьуниз эвер гана.
ЦIийи майдан ачухунин кьилин ярж — яру цIиргъ — Фарид Агьмедовани Мегьарамдхуьруьн 1-нумрадин юкьван мектебдин директор Эдуард Рагьимханова атIана.
Мярекат “Мегьарамдхуьр” ансамблдин коллективди тамамарай кьуьлери мадни гурлу авуна.
Чи мухбир
