И йикъара Дагъустандин Гьукуматдин председатель Артем Здунован регьбервилик кваз кьиле фейи совещанидал РФ-дин гьукуматдин ва федеральный программаяр уьмуьрдиз куьчуьрмишунин сергьятра аваз республикадиз атанвай такьатар ишлемишунин месэлаяр веревирдна.

РД-дин Кьилин ва Гьукуматдин пресс-къуллугъди хабар гузвайвал, гьар гьафтедин совещанидин сергьятра аваз министерствойрин ва кар алай идарайрин жавабдар къуллугъчийри госпрограммаяр уьмуьрдиз куьчуьрмишунин жигьетдай авунвай кlвалахдин гьакъиндай галай-галайвал малумарна.

Икl, «Ватандашар яшамиш жедай хъсан ва къулай кlвалералди ва коммунальный жигьетдай ийизвай къуллугъалди таъминарун» гьукуматдин программа бажармишунин карда тайинарнавай 400 миллион манатдилайни гзаф такьатар, совещанидал къейд авурвал, саки вири талукь тир хиле харжнава.

Совещанидин иштиракчийри «Хуьрерин мулкар дурумлудаказ еримлу авун» федеральный программадиз талукь яз хуьрерин чкайра яшамиш жезвайбурун шартlар хъсанарунин месэлани веревирдна. И хиляй яз тайинарнавай 180 миллион манатдикай 150 миллион манат и программа бажармишунин рекье ишлемишнава.

«Им лап итижлу программа я. Чара авунвай такьатар нетижалудаказ ишлемишун патал жавабдар ксари кьетlен гуьзчивал тухун герек я. Тайинарнавай такьатар истемишнрив кьадайвал харжун лазим я», — къейдна Артем Здунова.

Гъвечlи ва юкьван карчивилин хилез гьукуматди ийизвай куьмекрикай рахадайла, къейдна хьи, и макьсадар кьилиз акъудун патал 70 миллион манат чара авунва, амма исятда и такьатрикай талукь тир хиле менфят къачунвач. Артем Здунова и месэладиз хъсандиз килигун ва нетижаяр вичиз раиж хъувун патал республикадин карчивилин ва инвестицийрин агентстводин регьбердал тапшурмишна.

Инал «2013-2020-йисара меденият ва туризм вилик тухун», «Транспортдин хел вилик тухун», «Образование вилик тухун», «Здравоохранение вилик тухун» ва маса программаяр уьмуьрдиз куьчуьрмишунин гьаларни веревирдна.

«Лезги газет»