И чIалар фригъви аялри чIехи шаир СтIал Сулейманан музей арадал хканвайвал акурдалай кьулухъ кхьейбур я. Абура къадирсуз ахмакьриз лагьанвай лянет, музей арадал хкайбуруз ийизвай гьуьрмет ава! Аялрин мецел чи халкьдин гафни ала…

 Сулейманаз

Кьудкъад йисар хьанва кечмиш хьана вун,

Им дуьньядин яшарин са легьзе я.

Акъвазнач вахт, чи кьисметдиз гана вун,

СтIалар ваъ, Лезгистан ви бине я.

 

Гьич са затIни агакьдач ви къаматдив,

Ви суйдилай са Шалбуз я кьакьанди.

Самур вацIу ацIурна вун къудратдив,

Къе хьанва вун хайи чилиз масанди.

 

Эй Сулейман, рагъ ава ви гафуна

Ибара хьиз мягькем, дегиш тежедай.

Ви фикирар ама къени тавуна,

Жеда, шаксуз, вахтара мад хъжедай.

Альбина  Рамазанова, 9-кл.

 

Аквазва чаз

Эй Сулейман, чIехи буба,

Вун фикиррай аквазва чаз.

Арифдар яз гьакьван зурба,

Вун шииррай аквазва чаз.

 

КукIварай шаламар шумуд,

Шад межлисрик кутур умуд.

Къалурайди иблисдиз гъуд

Ви ивиррай аквазва чаз.

 

Зегьметкешдин авун тариф,

Ватандиз чан гунни югъ-йиф,

Халкьдиз илгьам татай гьайиф,

Тавазийрай аквазва чаз…

Марьям  Дадашева, 9-кл.

Танита  Сефиханова, 9-кл.

 

Гафарин тур

Сулейман, на виш ктабар

КIелна уьмуьрдин,

Халкьдин макьсад вуч затI ятIа

Чирна фикирдин.

Дидед чIалан ажайибвал

Ачухна жуваз.

Адакай ваз тIаратI хьана,

Фена вун ам гваз.

Элкъвенач вун ви рекьелай

Садрани кьулухъ,

Легьзедани гадарнач на

Лезгийрин махлукь.

Ачух хьана кесибвилин

Вазни а сирер,

Чирни хьана гьинай ятIа

Накъварин селлер.

Ахпа вуна гатана фад

Гафарикай тур,

Чиновникар ийиз кукIвар,

Гьахъсузвал авур.

Альбина  Хидирова, 9-кл.

 

Мубаракрай!

Зи лезги халкь, цIийи музей

РикIивай ваз мубаракрай!

Куькве туна икI гуьзелдиз

ТуькIуьрай саз мубаракрай!

 

Чпи фикир гайи артух,

Рухвайрин кар гъилер ачух,

Тамашуниз вич ярашугъ,

Руьгьдин аваз мубаракрай!

 

Музей-кIвалив гвачни дамах!

Женнетдин багъ галай къвалахъ.

Вич Шалбуздин ятIа яйлах?

Гьейрандин наз мубаракрай!

 Карина  Гьажимегьамедова, 8 “б” кл.

 

Хкведа!

Чи Сулейман бубадин

КIвализ яна цIай

Са алчахди келле буш,

Руьгь авай кьацIай.

Вири кана, амукьна

Са сятни са цIиб,

Шагьидар яз субутдай

СанкIардин айиб.

Къайгъу авач! Хкведа

Чкайрал вири:

Валчагъ, бармак, пер, гапур,

Кутар ва куькIуь…

Селимат  Ашурагъаева, 9-кл.